İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 252 Hüküm no: 277 Orijinal metin no: [76b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hâfız Mehmed’in Şam tüccarından gizlice yüksek fiyatla aldığı kaysıları diğer esnafa rayici üzerine satmasının talep edildiği Ma‘rûz Meyve-i huşk Esnâfı Kethüdâsı el-Hâc Hasan Ağa ve el-Hâc Mustafa Ağa ve Ali Ağa ve el-Hâc Ali Ağa ve el-Hâc Ahmed Ağa ve Molla Halil ve Molla Mustafa ve el-Hâc Ahmed Ağa ile Hoşabçılar Kethüdâsı Hasan Ağa, Yiğitbaşı Halil ve Hüseyin Usta ve Mehmed Usta ve Mustafa Usta ve Ahmed Usta ve Hasan Efendi ve Süleyman Usta ve Salih Usta ve Mehmed Usta ve Hüseyin Usta nâm kimesneler meclis-i şer‘-i şerîf-i enverde mahmiyye-i İstanbul’da Sultân Bâyezid Câmi‘-i Şerifi kurbünde Parmakkapı nâm mahalde vâki‘ balmumcu esnâfından derûn-ı arzuhâlde mezkûr Hâfız Mehmed b. Ebabekir mahzarında her biri takrîr-i kelâm edip mezbûr Hâfız Mehmed kendi kesbine kanâ‘at etmeyip bu esnâda Şâm-ı Şerîf cânibinden tüccârdan Şâmî el-Hâc Zekeriya ve Şerîki el-Hâc Suhan nâm kimesnelerin bahren sefîne ile Âsitâne’ye getirdikleri kaysılarından hufyeten elli zenbil kaysı iştirâ ve ahz ve ziyâde semen ile âhara bey‘ ve ihtikâr ettiği sâ’ire dahî sirâyet edip men‘i lâbüd ve lâzım olmağla merkûm ile muhâsama kasd eylediğimizde ol dahî ber-vech-i muharrer tüccâr-ı merkûmândan zikr olunduğu mikdâr kayısı iştirâ eylediğini ba‘de’l-ikrâr kat‘an li’l-husûme hâlâ yedinde mevcûd yirmi iki zenbil kaysısını semen-i ma‘lûme bize bey‘ ve temlîk ve min ba‘d ihtikâr olur harekâta tasaddî etmemekle ta‘ahhüd ettikde biz dahî râzı ve zikr olunan yirmi zenbil kaysıyı vech-i muharrer üzere iştirâ ve temellük eyledik deyü eylediği bi’l-cümle takrîrleri mezbûr Hâfız Mehmed tasdîk ve bu vecihle kat‘-ı nizâ‘ eyledikleri huzûr-ı âlîlerine i‘lâm olundu. Fî 2 min Saferi’l-hayr sene 1203.