İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 253 Hüküm no: 279 Orijinal metin no: [76b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Mehmed Emin Efendi’nin vakıf ev hissesini Zeliha Hatun’a sattığı Ma‘rûz Sâdır olan fermân-ı âlîlerine imtisâlen savb-ı şer‘-i enverden mürsel Başkâtib Ahmed Efendi hâssa mi‘mârı hulefâsından Ali ve Süleyman Halîfeler ile İstanbul’da Cezerî Kasımpaşa mahallesinde vâki‘ Hâce Hadîce bt. Abdullah’ın sâkine olunduğu menzile varıp huzûr-ı Müslimînde ba‘de akdi’l-meclis derûn-ı arzuhâlde Nefîse Hatun Vakfı mütevellîsi mahalle-i mezbûre imâmı Ahmed Efendi b. Mustafa hâzır olduğu hâlde Zeliha bt. el-Hâc Mehmed nâm hatunun zevci tarafından vekîl-i müsecceli sâhib-i arzuhâl el-Hâc Mehmed Emin Efendi b. İsmail mahzarında işbu derûnunda akd-i meclis olunan ma‘lûmü’l-hudûd ve’l-müştemilât bir bâb menzilin nısfı benim ve nısf-ı şâyi‘-i âharı müvekkile-i mezbûre Zeliha Hatun’un bi’l-icâreteyn tasarrufumuzda olmağla müvekkile-i mezbûre menzil-i mezkûrda olan nısf hisse-i şâyi‘asını [77a] ifrâz murâd ettikde mi‘mârân-ı mezbûrân Müslimûn-ı hâzırûn ile ba‘de’l-keşf ve’l-mu‘âyene menzil-i mezkûr kâbil-i taksîm olmadığın ihbâr etmeleriyle beynimizde ba‘de vukû‘i’l-münâza‘a beni menzil-i mezkûrdan mutasarrıfe olduğum nısf hisse-i şâyi‘amı hüsn-ı rızâ ve tayyib-i ihtiyârım ve şürût-ı müfsideden ârî ferâğ-ı mu‘teber-i kat‘î ile bin guruş bedel mukâbelesinde müvekkile-i mebûre Zeliha Hatun’a bâ-re’y-i mütevellî ferâğ ve tefvîz eylediğimde vekîl-i mezbûr dahî bi’l-vekâle tefevvüz ve kabûl ve bedel-i merkûm bin guruşu bana def‘ ve teslîm eyledikde ben dahî yedinden tamâmen ahz u kabz ve istihlâk eyledim fîmâ ba‘d menzil-i mahdûd-ı mezkûrun mecmû‘ı müvekkile-i mezbûrenin dâhil-i havza-i tasarrufu olup benim kat‘an alâka ve medhalim kalmamağla husûs-ı mezkûra ve bi’l-cümle hukûk-ı sâ’ireye müte‘allika âmme-i da‘vâdan müvekkile-i mezbûre Zeliha Hatun’un zimmetini ibrâ-i âm ile ibrâ ve iskât eyledim dedikde vekîl-i mezbûr dahî mukırra-i mezbûreyi tasdîk ve ibrâsını bi’l-vekâle ba‘de’l-kabûl mütevellî-i mezbûr mecmû‘ menzil-i mezkûrda müvekkile-i mezbûre Zeliha Hatun’un tasarrufu re’y eylediğini mevlânâ-yı mezbûr mahallinde ketb ve tahrîr ve ma‘an mürsel ümenâ’-i şer‘le meclis-i şer‘a inhâ eyledikleri huzûr-ı âlîlerine i‘lâm olundu. Fî 23 mine’l-Muharrem sene 1203.