İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 254 Hüküm no: 280 Orijinal metin no: [77a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Efendi ve ortağı Hâfız Mehmed’in hilâf-ı kânûn hareketlerinden dolayı attarlık mesleğinden çıkarılması Ma‘rûz İstanbul’da Bahçekapısı kurbünde Tahmîs civârında vâki‘ Sûk-ı Cedîd’de kâ’in attârân kethüdâ vekîli es-Seyyid Süleyman Ağa ve el-Hâc Hüseyin Ağa ve Yiğitbaşı el-Hâc Abdi Ağa ve el-Hâc İbrahim Ağa ve Mehmed Ağa ve es-Seyyid Musa Ağa ve el-Hâc Abdi Ağa ve es-Seyyid Mustafa Ağa ve el-Hâc İbrahim Ağa ve es-Seyyid Mehmed Said Ağa ve es-Seyyid Mustafa Ağa ve Hâfız Ahmed Efendi ve es-Seyyid Mustafa Ağa ve es-Seyyid el-Hâc İbrahim ve Parmakkapı’dan el-Hâc İbrahim Ağa ve el-Hâc Mehmed Ağa ve el-Hâc Feyzullah Ağa ve el-Hâc Hüseyin Ağa ve Yiğitbaşı İsmail Ağa vesâ’ir mazbûtü’l-esâmî attârân meclis-i şer‘-i şerîf-i enverde Sultân Bâyezid kurbünde Parmakkapı’da kâ’in attârlardan olup Ağakapısı’nda Mumcu Mustafa mübâşeretiyle ihzâr olunan İbrahim Efendi b. Ebabekir mahzarında merkûm İbrahim Efendi ve karındaşı ve şerîkini gâ’ib ani’l-meclis Hâfız Mehmed mârrü’z-zikr Parmakkapı’da attâr olup lâkin kendi kesblerine kanâ‘at etmeyip taşradan Âsitâne-i aliyye’ye vürûd eden şeker ve karanfil ve darçın ve kitre ve sa‘leb vesâ’ir bi’l-cümle attâra mahsûs eşyâ Sûk-ı Cedîd attârları kethüdâ ve müsin ihtiyârları ma‘rifetiyle tüccârdan iştirâ ve şekerin beş sehm i‘tibârıyla iki sehmini akîdeci ve şerbetçi esnâfına verip ve üç sehm şeker ile eşyâ-i sâ’ire beyinlerinde iktisâm ve taşra attârları ve ibâdullâha iktizâ edeni Sûk-ı Cedîd attârından iştirâ olunup hâric olanlar tüccârdan hufyeten nesne almamak bâ-hatt-ı hümâyûn memnû‘ iken merkûmân ihtikâra sâlih ve mâl-ı tüccârı hufyeten iştirâ ve mazarratları âmmeye sirâyet edip bir kaç def‘a kendilere tenbîh olunmuşken mütenebbih olmamalarıyla savnen li’l-ibâd ve hıfzen li’n-nizâm merkûmlar dükkânlardan hurûc ve müksib-i âhara şürû‘ ile şerr ü mazarratları üzerimizden ref‘ olunmak murâdımızdır deyü eyledikleri bi’l-cümle takrîrleri vâkı‘a mutâbık olduğu lede’ş-şer‘ zâhir olmağın merkûmlar ber-vech-i muharrer esnâf-ı mezbûr derûnundan hurûc ve müksib-i âhara şürû‘ları bâbında emr-i âlî sudûru emr-i savâb olduğu İstanbul Mahkemesi’nden huzûr-ı âlîlerine i‘lâm olundu. Fî 7 min Safer sene 1203.