İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 255 Hüküm no: 281 Orijinal metin no: [77a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yanan Minâreli Tahta Hân’ın içinde gayr-ı Müslim oturmaması ve içki satılmasına izin verilmemesi şartıyla yeniden inşasının kabul edildiği Ma‘rûz Mübârek rikâb-ı kâm-yâb-ı müstetâba takdîm olunan arzuhâl bâlâsında şeref-yâfte-i sudûr olan hatt-ı hümâyûn-ı şevket-makrûn mûcibince sâdır olunan fermân-ı âlîlerine [77b] imtisâlen cânib-i şer‘-i enverden mürsel Başkâtib Ahmed Efendi ve izzetlü sekbânbaşı ağa ve Harameyn-i muhteremeyn müfettişi müderrisîn-i kirâmdan fazîletlü es-Seyyid Abdülhalim Efendi tarafından mürsel Mehmed Nurullah Efendi ve nezâret-i hazret-i şeyhü’l-islâmîde âsûde evkâf müfettişi müderrisîn-i kirâmdan fazîletlü Salih İsmail Efendi tarafından mürsel müderrisîn-i kirâmdan Abdülkadir Efendi ve nezâret-i hazret-i sadr-ı a‘zâmîde âsûde evkâf müfettişi müderrisîn-i kirâmdan fazîletlü el-Hâc İbrahim Efendi tarafından mürsel es-Seyyid Lütfullah Efendi ve hâssa mi‘mârı ağa ve hulefâlarından el-Hâc Ahmed Nuri ve Mehmed Arif Halîfeler ile İstanbul’da Kırkdört kapısı kurbünde Kadıasker Hamâmı civârında Balaban Ağa mahallesinde vâki‘ nezâret-i sadr-ı a‘zamîde âsûde evkâfdan defterdâr-ı esbak Derviş Mehmed Efendi Vakfı musakkafâtından hâlâ ulyâ ve vüstâsında on iki bâb nâ-tamâm odalı ahşâbdan binâ olunan hâneye varıp huzûr-ı Müslimînde akd eyledikleri meclis-i şer‘-i kavîmde arzuhâlde olan istid‘âya ba‘de’n-nazar ashâb-ı arzuhâl mahalle-i mezbûre imâmı es-Seyyid Ahmed Efendi ve Müezzin Molla Osman ve ahâlîsinden Yorgânî es-Seyyid el-Hâc Ahmed Efendi ve Tüfenkçibaşı Ahmed Ağa ve Sultân Mustafa Hân Câmi‘-i İmâmı Ahmed Efendi ve Mehmed Said Efendi ve Mehmed Sadık Efendi ve Kızıltaş İmâmı Osman Efendi ve Kayyımbaşı Süleyman Efendi ve Molla Kestel İmâmı Mustafa Efendi ve Şeyhü’l-kurrâ el-Hâc Osman Efendi ve es-Seyyid el-Hâc Hüseyin ve Mustafa Odabaşı ve Çörekçi Ahmed Ağa ve Mustafa Odabaşı ve Doğramacı Mustafa Efendi ve el-Hâc İbrahim ve Mehmed Ağa ve es-Seyyid Salih Beşe ve el-Hâc Mustafa ve el-Hâc Ahmed ve Salih ve Attâr Mehmed Ağa ve Yazıcı Mehmed Efendi ve Hammâmî Mehmed Ağa nâm kimesneler meclis-i ma‘kûd-ı mezkûrda vakf-ı mezbûr mütevellîsi vekîli câbî-i vakf İsmail Efendi hâzır olduğu hâlde hân-ı mezkûra bi’l-icâreteyn mutasarrıflar olan müderrisîn-i kirâmdan Ahmed Raşid Efendi ve Kara Mehmed Yemenî Efendi tarafından vekîli olduğu el-Hâc Ahmed b. Ali ve el-Hâc Mehmed b. Mehmed şehâdetleriyle sâbit olan diğer el-Hâc Mehmed Ağa b. İbrahim mahzarında mârrü’z-zikr Kadıasker Hamâmı civârında beş aded tahta hân derûnlarında kefere mütemekkin olmalarıyla her bir hânın ikişer üçer odasını meygede ittihâz ve bey‘-i hamr etmeleriyle leyl ü nehâr şürb-ı hamr eden keferenin sadâları mersûm Sultân Mustafa Hân Hazretleri Câmi‘-i Şerîfi’nde kırâ’at olunan Ezân-ı Muhammediye’yi istimâ‘ımıza mâni‘ olduklarından mâ‘adâ mahâll-i mezkûrede şürb-ı hamr eden kimesnelerin mazarratından eyyâm ve leyâlîde salât-ı farîzayı edâ içün sûk-ı mezbûrdan câmi‘-i şerîfe mürûra cümlemize havf-târî olmağla müvekkilân-ı mezbûrân dahî hân-ı mezkûru hilâf-ı fermân-ı âlî müceddeden binâ etmekle ba‘de’t-tekmîl kefere iskân ve mârrü’z-zikr hânlar misillü bey‘-i hamr ederler deyü teşekkî ve hân-ı mezkûrun hedmini ve mârrü’z-zikr hânlarda olan bey‘-i hamrın men‘ini iltimâs eylediklerinde mevlânâ-yı mezbûrûn ağa-yı mûmâileyhimâ ve Müslimûn-ı hâzırûn ile hamâm-ı mezkûr külhanı ittisâlinde Bozacılar Hânı’nda odalar tahtında üç aded bodrum ve civârında Küçük Hân dimekle meşhûr hânda bir aded bozahâne ve vüstâsında bir bâb oda ve karşısında Kahvecibaşı Hânı’nda bir bâb oda meygede ittihâz olunup bey‘-i hamr olunacak mahal ve bir mikdâr hamr mevcûd bulunduğunu ba‘de’l-mu‘âyene izzetlü sekbânbaşı ağa zikr olunan üç aded hânlarda olan altı aded oda ve bodrum ve bozahâneyi temhîr ve fimâ ba‘d bey‘-i hamr olunmamak üzere men‘-i ekîd ile men‘ ettikden sonra vekîl-i mezbûr yedinde olan müvekkilân-ı mezbûrânın mutasarrıf oldukları Minâreli? Tahta Hân’ın atîk temessüküne [78a] ve bir kıt‘a i‘lâm-ı şer‘îye nazar eylediklerinde hân-ı mezkûr kable’l-harîk on yedi bâb odalı kadîm hân olup ba‘de’l-harîk bâ-i‘lâm-ı şer‘î binâsına mübâşeret olunduğu musarrah olmağla vekîl-i mezbûr ba‘de’t-tekmîl hân-ı mezkûrda kefere iskân etmeyip ehl-i ırz Müslim kimesneler iskân etmek üzere bi’l-vekâle ta‘ahhüd ettikde ahâlî-i mezbûrûn dahî râzılar olup bu vecihle kat‘-ı münâza‘a eyledikleri huzûr-ı âlîlerine i‘lâm olundu. Fî 29 min Muharremi’l-harâm sene 1203.