İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 260 Hüküm no: 289 Orijinal metin no: [79b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Mehmed Tahir’in yeni inşa ettiği evin temel ve pencerelerinin, el-Hâc Mehmed’in evine zarar vermesi sebebiyle bu zararlarının giderilmesinin talep edildiği Sâdır olan fermân-ı âlîlerine imtisâlen kıbel-i şer‘den mürsel İkinci Kâtib Merhabâzâde Mahmud Efendi hâssa mi‘mârı hulefâsından İsmail ve Ali Reşid Halîfeler ile İstanbul’da Kızıltaş mahallesinde vâki‘ el-Hâc Mehmed Tahir’in menziline varıp huzûr-ı Müslimîn’de ba‘de akdi’l-meclis sâhib-i arzuhâl el-Hâc Mehmed b. İbrahim meclis-i ma‘kûd-ı mezkûrda derûn-ı arzuhâlde ismi mezkûr mezbûr el-Hâc Mehmed Tahir b. el-Hâc Mehmed muvâcehesinde mezbûr el-Hâc Mehmed Tahir bundan akdem binâ eylediği işbu akd-i meclis olunan menzilin vaz‘-ı kadîmini tagayyür ve ulyâsında ihdâs eylediği odasında idi aded pencereleri târîh-i i‘lâmdan bir gün mukaddem zikr olunan odanın duvarını hedm ve bir aded pencere dahî küşâd ve vüstâsında iki aded pencere ihdâs etmekle benim kadîmî menzilimin makarr-ı nisvân olan mahallerine nezâret ve zarar-ı bînî olmağla men‘ ve ref‘ olunmak matlûbumdur deyü da‘vâ ettikde mi‘mârân-ı mezbûrân Müslimûn-ı hâzırûn-ı mezbûrûn ile ba‘de’l-keşf ve’l-mu‘âne mezbûr el-Hâc Mehmed Tahir’in mârrü’z-zikr ulyâsında olan odada ve iki aded pencere ve vüstâsında odada mevcûd iki aded pencere muhdes olup ve müdde‘î-i mebûre zarar-ı şer‘iyyesi olduğunu mahalle-i mezbûre imâmı Osman Efendi b. Mehmed ve Abdullah Ağa b. Abdullah ve Ali Ağa b. Halil ve diğer Ali Efendi b. Mustafa ve Bostânî el-Hâc Memiş b. Ali nâm kimesneler alâ tarîkı’ş-şehâde haber verdiklerinden mâ‘adâ mezbûr el-Hâc Mehmed Tahir dahî ulyâsında oda ve pencere ve vüstâsında iki aded pencere ihdâsını ikrâr ve i‘tirâf etmeğin mûcebince zikr olan (...?) ulyâda olan odanın üç aded pencerelerinin zarar-ı şer‘îsi ve nezâretini ref‘a ve vüstâ odasında iki aded pencerelerinin tahta havâle ile nezâret ve zarârını def‘a mezbûr el-Hâc Mehmed Tahir’e tenbîh eylediğini kâtib-i mezbûr mahallinde ketb ve tahrîr ve ma‘an mürsel ümenâ’-i şer‘le meclis-i şer‘a gelip alâ vukû‘ihî inhâ ve takrîr eyledikleri huzûr-ı âlîlerine i‘lâm olundu. Fî 4 min Rebî‘i’l-evvel sene 1203.