İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 261 Hüküm no: 290 Orijinal metin no: [79b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeyneb Hatun bt. Mehmed ile İbrahim Efendi arasındaki miras paylaşımında sulh yoluyla anlaştıkları Ma‘rûz Sâdır olan emr-i âlîlerine imtisâlen sâhibe-i arzuhâl ma‘rifetü’z-zât Zeyneb Hatun bt. Mehmed Çarşamba günü Dîvân-ı âlîlerinde ba‘dehû dâ‘îhânede ma‘kûd meclis-i şer‘-i şerîf-i enverde derûn-ı arzuhâlde mezkûr kuzâtdan İbrahim Efendi b. Hasan mahzarında derûn-ı arzuhâlde mezkûrü’l-ism müteveffâ Halil b. Hasan’ın verâseti zevce-i menkûha-i metrûkesi olmamağla bana ve li-ebeveyn karındaşı olmağla merkûm İbrahim Efendi’ye münhasıra olup ve zevcim müteveffâ-yı mezbûr ma‘tûh olup umûrunu rü’yete kâdir olmamağın merkûm İbrahim Efendi emvâlini hıfz ve umûrunu rü’yete bâ-hüccet vasî ve kayyım nasb olunduğuna binâ’en zevcim mezbûrun hayâtında yedinde mülkü olup Bebek nâm mahalde vâki‘ nısf menzilini bi’l-vesâye âhara bey‘ etmekle kabz eylediği dört yüz guruş semeni ve yine âhar bir bâb mülk menzilinden irsen hissesi olan sekiz sehimde bir sehim hissesini âhara bey‘ etmekle kabz eylediği yüz guruş semen ile ba‘de vefâtihî mevcûd olup kabz eylediği sekiz minder, on yasdık, bir döşek, on sahan, dört tencere, bir leğen, ibrik, iki tebsi, on kahve ibriği ve fincan ve bir şerbet ibriği ve bir oda döşemesinden müteveffâ-yı mezbûr zimmetinde mütekarrer ve ma‘kûdun aleyh mehr-i mü’eccel hakkım olan on bin akçe ile mâ‘adâdan hisse-i mefrûzam taleb ve da‘vâ ettiğimde ol dahî cevâbında zikr olunan iki bâb mülk menzilden hisselerini hayâtında âhara bey‘ ve semen olmak üzre beş yüz guruşu kabzını ikrâr mâ‘adâ eşyâ-i muharrer-i mezkûreyi külliyen inkâr edip ve makbûzu olan meblağ-ı mezkûr beş yüz guruşun dahî üç yüz doksan beş guruşunu hayâtında müteveffâ-yı mezbûrun bâ-hüccet nafaka-i mefrûzasına ve yirmi beş guruşunu dahî ba‘de vefâtihî techîz ve tekfîne sarf edip ancak zimmetimde seksen guruşu kalmışdır deyip ol vecihle beynimizde münâza‘ât-ı [80a] kesîre vâkı‘a olmuşidi elhâletü hâzihî bâ-vesâtat-ı muslıhîn mezbûr İbrahim Efendi ile da‘vâ-yı mezkûremden yüz guruş üzerine sulh olup her birimiz sulh-ı mezbûru kabûl ve bedel-i sulh-ı mezkûr yüz guruşu bi’t-tamâm kabz ve istîfâ-yı hak edip ba‘de’l-yevm tereke-i müteveffâ-yı mezbûrdan mehr-i mü’eccel ve hisse-i mutâlebesine ve târîh-i i‘lâma gelince cemî‘ hukûk-ı şer‘iyyeye müte‘allika âmme-i da‘vâdan mezbûr İbrahim Efendi’nin ben ol dahî kezâlik benim zimmetimi ibrâ ve iskāt eylediğimizde her birimiz ibrâ-yı mezkûru kabûl eyledik deyü eylediği takrîr-i meşrûhunu mezbûr İbrahim Efendi tasdîk ve bu vecihle kat‘-ı nizâ‘ eyledikleri huzûr-ı âlîlerine i‘lâm olundu. Fî 5 Rebî‘ü’l-evvel sene 1203.