İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 262 Hüküm no: 291 Orijinal metin no: [80a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Markar v. Mığırdıç ile ortağı Hürmüz v. Yani’nin, Emetullah Hatun’a olan borçlarının ödenmesinin emredildiği Ma‘rûz İstanbul’da Aksaray nâm mahalde sâkine olup zâtı Ahmed b. Feyzullah ve Hüseyin b. Hasan ta‘rîfleriyle mu‘arrefe olan Emetullah Hatun bt. Mehmed meclis-i şer‘-i şerîf-i enverde Haffâf Markar v. Mığırdıç ile şerîki Hürmüz v. Yani nâm muvâcehelerinde takrîr-i kelâm edip bir kıt‘a temessük mûcibince ancak mersûm Markar zimmîye mâlımdan iktirâz ve teslîm ol dahî iktirâz ve kabz eylediği sekiz yüz guruşdan beş yüz guruşunu mersûm Markar zimmî bana edâ ve teslîm ben dahî kabz edip âhar bir kıt‘a temessük mûcibince dahî kezâlik mâlımdan mersûm Markar ile şerîki mesfûr Hürmüz zimmîye ikrâz ve teslîm anlar dahî iktirâz ve kabz eyledikleri beş yüz guruşun kezâlik dört yüz guruşunu mersûmân bana edâ ve teslîm edip elhâletü hâzihî mersûm Markar zimmî zimmetinde iki kıt‘a temessükden bâkî üç yüz elli guruş ve şerîki mesfûr Hürmüz zimmî zimmetlerinde bir kıt‘a temessükden bâkî elli guruş alacağım olup meblağayn-ı mezkûreynden mâ‘adâ mersûmân zimmetlerinde aslâ ve kat‘â hakkım olmayıp ve zikr olunan iki kıt‘a temessük zevcim sâbıkan Baştebdîl? Feyzullah Ağa b. Ahmed yedinde olmağla tarafımdan vekâleten yâhûd vücûh-ı âhar ile mersûmândan nesne mutâlebe eder ise ameli i‘tibâr olunmaya deyü eylediği takrîr-i meşrûhunu mersûmân tasdîk ve hâlâ zimmetinde mezbûre Emetullah Hatun’a üç yüz elli guruş deyni olduğunu mersûm Markar ve elli guruş deyni olduğunu şerîki mesfûr Hürmüz zimmî ikrâr ve i‘tirâf etmeğin alâ mûcib-i ikrârihimâ meblagayn-i mezkûreyni mezbûre Emetullah Hatun’a edâ ve teslîme mersûmâna bi’t-taleb tenbîh olunduğu İstanbul Mahkemesi’nden huzûr-ı âlîlerine i‘lâm olundu. Fî 5 min Rebî‘i’l-evvel sene 1203.