İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 262 Hüküm no: 292 Orijinal metin no: [80a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Akarvi bt. Kiryako’nun, Şerbetçi Dimitraki’den aralarında belirlenen mal ve nafaka üzerine boşanıp birbirlerinin zimmetlerini ibra ettikleri Ma‘rûz Sâdır olan emr-i âlîlerine imtisâlen arzuhâl eden şahs-ı mu‘arrefe Akarvi bt. Kiryako nâm Nasrâniye Dîvân-ı âlîlerinde ma‘kûd meclis-i şer‘-i şerîf-i enverde derûn-ı arzuhâlde mezkûr Şerbetçi Dimitraki v. İlya nâm zimmî muvâcehesinde mersûm Dimitraki zimmî bundan akdem benim zevc-i dâhilim olup hüsn-ı mu‘âşeretimiz olmamağın bi’ş-şikâk beynimizde iftirâk vâki‘ olup mersûmun firâşından hâsıl ve benden mütevellide sulbiye sagîre kızı Kadanko hâlâ bi-hakki’l-hısâne benim yedimde olmağın mersûm üzere beher şehr beş nafaka karz ve takdîr olunup ve yedinde olan ber-mûceb-i defter-i müfredât üç beledî yasdık, iki minder, bir döşek, bir baş yasdık ve bir çârşeb, iki yorgan, bir sandık, iki ketan tarağı, sagîr sini, iki tâbe, bir tencere, bir destgâh, bir teknelik, bir çift hamâm na‘lını ve eşyâ-i sâ’iresi dahî bana tamâmen def‘ ve teslîm ben dahî ahz u kabz [80b] edip târîh-i i‘lâma gelince hukûk-ı zevciyete ve cemî‘ hukûk-ı şer‘iyyeye müte‘allika âmme-i da‘vâdan zimmetini ibrâ ve iskāt eylediğimde ol dahî kezâlik benim zimmetimi ibrâ ve iskāt ve her birimiz âharın ibrâsını kabûl eyledik deyü eylediği takrîr-i meşrûhunu mersûm Dimitraki tasdîk eylediği İstanbul Mahkemesi’nden huzûr-ı âlîlerine i‘lâm olundu el-emrü li-veliyyi’l-emr. Fi’l-yevmi’r-râbi‘ min Rebî‘i’l-evvel li-sene selâse ve mi’eteyn ve elf.