İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 263 Hüküm no: 293 Orijinal metin no: [80b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Lazari v. Nikola’nın mutasarrıf olduğu kasap dükkanı gedik hisse ve aletlerini el-Hâc Hasan Ağa’ya sattığı Ma‘rûz Evkâf-ı hümâyûn-ı hazret-i şehriyârîden Üçüncü Selhhâne’ye merbût olup İstanbul’da Kadırga Limânı nâm mahalde vâki‘ bir bâb kasab dükkânı derûnunda mevcûde beyne’l-hıref gedik ta‘bîr olunur âlât-ı lâzımenin nısfına mütevellî-i vakf temessüküyle mutasarrıf Lazari v. Nikola nâm zimmî meclis-i şer‘-i şerîf-i enverde hâlâ Kasabbaşı Mehmed Emin Ağa tarafından vekîli Kasab Kethüdâsı el-Hâc Ali Ağa ve ma‘lûmü’l-esâmî ustalar hâzırlar oldukları hâlde Yeni Câmi‘ili el-Hâc Hasan Ağa b. Mustafa tarafından vekîli İsmail Ağa b. Mehmed mahzarında ber-minvâl-i muharrer mutasarrıf olduğum nısf âlât-ı lâzımemi hüsn-ı rızâ ve tayyib-i ihtiyârımla bedel-i ma‘lûm ve makbûz mukâbelesinde müvekkil-i mezbûr el-Hâc Hasan Ağa’ya ferağ ve tefvîz ol dahî tefevvüz ve kabûl edip ba‘de’l-yevm nısf âlât-ı mezkûrede benim kat‘â alâka ve medhalim kalmayıp merkûm el-Hâc Hasan Ağa’nın hakk-ı mufavvazı olmuşdur deyü eylediği takrîr-i meşrûhunu vekîl-i mezbûr ba‘de’t-tasdîk nısf âlât-ı mezkûrenin defter-i vakfdan mersûm üzerinde olan kaydı terkîn ve müvekkil-i mezbûr üzerine kayd ve yedine temessük i‘tâ olunmak ricâsında olduğu İstanbul Mahkemesi’nden huzûr-ı âlîlerine i‘lâm olundu. Fî 15 min Saferi’l-hayr sene 1203.