İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 72 Hüküm no: 7 Orijinal metin no: [2a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkalların tuzlu balık satmasına, balık tuzlayıcı esnafının müdahale etmemeleri Bakkālânın tuzlu balık bey‘ u şirâsına mümâna‘at etmemelerine balık tuzlayıcı merkūmûna tenbîh olunduğu Ma‘rûz Mahrûse-i Galata’da Karaköykapısı hâricinde kâin Serkiz dükkânı demekle ma‘rûf ve gediği başmuhâsebede mukayyed olan bir bâb bakkāl dükkânının müsteciri olup arzuhâl eden Yuvan v. Danil zimmî meclis-i şer‘-i münîrde mahrûse-i mezbûrede Havyarcı tâ‘bir olunur bakkāl esnâfından Panayot v. Toma ve Lefter v. İstefan ve Mosi v. İstefan zimmîler muvâcehelerinde bakkālân esnâfının Pazarbaşısı Süleyman Ağa ve bölük başıları es-Seyyid Ahmed ve nizâm ustalarından Nikola ve Yorgi ve Rizo ve Kiryako ve Niko ve diğer Yorgi ve Nikola ve Lazari ve âhar Yorgi ve Todori ve Mihal ve Sava ve Vasil ve Hristo ve Kiryako vesâirleri hâzır oldukları hâlde kadîmden beri bakkālân esnâfı havyar ve mersin balığı ve tuzlu balık tedârik ve iştirâ ve bey‘ edegelip bi-gayr-ı vech-i şer‘î müdâhale iktizâ etmez iken mersûmûn Panayot ve Lefter ve Mosi zimmîler şehr-i sâbık Recebi’l-ferdinin on dokuzuncu günü yalnız beni ahz ve Galata mahkemesine götürüp biz balık tuzlayıcı esnâfından olup envâ‘-ı balık tuzlamak bize mahsûs olmağla taşradan gelen havyar ve mersin ve uskumru ve morina vesâir tuzlu balık ve balık yumurtasının bey‘ u şirâsı mahrûse-i mezbûrede on sekiz aded dekâkîne mahsûs iken muhdes olan bakkāl dükkânında bakkāllık eder iken bize mahsûs olan emti‘amızı iştirâ ve bey‘ eder deyü benden teşekkî ve merâmlarına muvâfık i‘lâm ahz etdik deyü beni bey‘ u şirâdan men‘ etmeleriyle suâl olunup mümâna‘atları men‘ ü def‘ olunmak matlûbumdur deyü da‘vâ ettikde onlar dahi cevâblarında kaziyye minvâl-i muharrer üzere olduğunu her biri tasdîk etmeleriyle mersûmûnun ber-vech-i muharrer mümâna‘atları hilâf-ı şer‘-i şerîf ve inhisâr-ı bey‘ u şirânın men‘i bâbında sudûr eden hatt-ı hümâyûn-ı sa‘âdet-redîfin mugāyiri olduğundan mâ‘adâ ötedenberü bakkālân esnâfı tuzlu balık ve havyar bey‘ u şirâ edip metâ‘larından olduğunu pazarbaşıları vesâir hâzirûn-ı merkūmûn inhâ etmeleriyle bu sûret ibâdullâha min-külli’l-vücûh enfa‘ ve evlâ idüğü zâhir ve âşikâr olmağla fîmâ ba‘d havyarcı esnâfı mersûmûn müdde‘î-i mesfûra vesâir bakkālân esnâfına havyar vesâir tuzlu balık bey‘ u şirâlarına mümâna‘at etmemek üzere esnâf-ı mersûmûna tenbîh olduğu İslâmbol Mahkemesi’nden huzûr-ı âlîlerine i‘lâm olundu. Fî-11 min Ş sene [1]216