İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 73 Hüküm no: 8 Orijinal metin no: [2a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Marka v. Anton’un kaynanası aleyhine açtığı davadan vazgeçtiği Mu‘ârazadan men‘ Ma‘rûz Arzuhâl eden Marko v. Anton zimmî meclis-i şer‘-i münîrde sâbıkā kayın anası mu‘arrafetü’ş-şahs Takfori bt. Koğas Nasrâniyye muvâcehesinde târih-i i‘lâmdan on iki sene mukaddem kayın anam mesfûre ile ma‘an mütemekkinler olduğumuz menzilde sandığım derûnundan mecmû‘u seksen bir guruş kıymetli on yedi çevre ve yirmi dört yemenî ile otuz guruş kıymetli iki sim tatlı tabağı ve bir sim tas ve on beş guruşluk bir kebîr altın ve üç yüz elli guruş kıymetli iki don ve iki uçkur ve iki bağlık ve bir gömlek ve iki çura ve bir şal bohça ve dört minder kılıfı ve on dört guruş kıymetli iki tenceremi fuzûlî ahz u istihlâk etmekle kıymet-i mezkûreleriyle dört sene mukaddem yedine îdâ‘ ve teslîm eylediğim on dokuz İslâmbol zer-i mahbûb ve elli beş guruş hâlâ yedinde olmağla taleb ederim deyü ba‘de’d-da‘vâ ve’l-inkâr müdde‘î-i mersûm ber-vech-i muharrer müdde‘âsını isbât için kirâren ve mirâren lede’l-istimhâl müddet-i mehl-i şer‘î mürûr ve ityân-ı beyyineye kādir ve tahlîfe dahi tâlib olmamağla mûcebince müdde‘î-i mersûm da‘vâ-yı mezkûresiyle mesfûre Takfori Nasrâniyye bilâ-beyyine mu‘ârazadan men‘ olunduğu İslâmbol Mahkemesi’nden huzûr-ı âlîlerine i‘lâm olundu. Fî-15 min-Şa‘ban sene [1]216