İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 73 Hüküm no: 9 Orijinal metin no: [2a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zenciye Zeyneb’e efendisine itâat etmesi için tenbih Rıkka inkıyâdına tenbîh Ma‘rûz Sâhib-i arzuhâl seryorgancıyân-ı hâssa es-Seyyid Ahmed Ağa b. Mustafa bi’t-terâzi dâ‘îhânemizde ma‘kūd meclis-i şer‘-i münîrde arzuhâlde mezkûre zâtı mu‘arrefe Zenciye Zeyneb bt. Abdullah mahzarında mezbûre Zenciye Zeyneb yedimde câriye-i memlûkem iken bana rıkka inkıyâddan ibâ vü imtinâ‘ etmekle suâl olunup rıkka inkıyâdına tenbîh olunmak murâdımdır deyü da‘vâ ettikde ol dahi cevâbında ben müdde‘î-i merkūmun yedinde câriye-i memlûkesi iken bin on dört senesi Muharreminden on yedi senesi Muharremine gelince kendiye hizmet etmek üzere beni kitâbete kesip altı ay kendiye hizmet eylediğimden sonra beni menzilinden tard-birle bâkī-i hizmetimden benim ve zimmetimi ibrâ ve iskāt etmekle bu vechile ben âzâd olmamla rıkka inkıyâddan imtinâ‘ ederim deyü eylediği da‘vâsını mevlâsı merkūm inkâr etmekle müdde‘iye-i mezbûre ber-vech-i muharrer müdde‘âsına şâhid olarak getirdiği kimesneler husûs-ı mezkûrdan bizim haber ve âgâhımız yokdur deyip ve şâhid-i âhar ikāmetinden izhâr-ı acz ve istihlâf etmeğin merkūm es-Seyyid Ahmed Ağa’ya ber-nehc-i şer‘î yemîn verilmekle mûcebince müdde‘iye-i mezbûre Zeyneb da‘vâ-yı mezkûresiyle bilâ-beyyine mu‘ârazadan ba‘de’l-men‘ mevlâsı mezbûra kemâ-fi’s-sâbık rıkka inkıyâdına mezbûre Zeyneb’e tenbîh olunduğu İslâmbol Mahkemesi’nden huzûr-ı âlîlerine i‘lâm olundu. Fî-18 min Ş sene [1]216