İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 74 Hüküm no: 10 Orijinal metin no: [2a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kahveci Ali b. Süleyman’ın, kardeşi Duhânî Süleyman’a müdahaleden men edildiği Müdâhalesi iktizâ etmediği Ma‘rûz Derûn-ı arzuhâlde mezkûrü’l-ism kahveci Ali b. Süleyman meclis-i şer‘-i hatîrde sâhib-i arzuhâl karındaşı Duhânî Süleyman b. Süleyman mahzarında İslâmbol’da Ayasofya-i Kebîr Câmi‘-i şerîfi kurbünde dört yol ağzında vâki‘ karındaşım mezbûr Süleyman ile iştirâken ve münâsafaten bi’l-îcâreteyn mutasarrıf olduğumuz bir bâb dükkânda olan nısf hissemde ayda dörder buçuk guruş kirâ kavliyle mezbûr Süleyman müstecirim olmağın gāyet-i şehr-i âtîde fesh-i îcâr etmemle dükkân-ı mezkûrda olan nısf hissemi tahliyye ve bana teslîme tenbîh olunmak murâdımdır deyü da‘vâ ol dahi cevâbında karındaşı müdde‘î-i mezbûrun nısf hissesinde müşâhereten müsteciri olduğunu tasdîk lâkin dükkân-ı mezkûrun gediği arzuhâl hâmişinde mastûr ve derkenâr nâtık olduğu üzere maden kaleminde mukayyed ve benim yedimde mülküm olup ve bu makūle tütüncü dükkânlarının mülk sâhiblerine kadîmi veregeldikleri kirâlarını ezâ ve cefâ etmeksizin edâ eylediklerinde kadîmi tağyîr ile kirâlarını artırmak sevdâsıyla veyâhud ızrâr kasdıyla bi-gayr-ı vechin ihrâc olunmamak üzere emr-i âlî sâdır olmuşdur dedikde müdde‘î-i mezbûr dahi dükkân-ı mezkûrun gediği minvâl-i muharrer üzere karındaşı mezbûrun mülkü olduğunu tasdîk etmekle hilâf-ı emr-i âlî ihrâc irâdesiyle müdâhalesi iktizâ etmediği müdde‘î-i mezbûr Ali’ye tefhîm olunduğu İslâmbol Mahkemesi’nden huzûr-ı âlîlerine i‘lâm olundu. Fî-17 min-Şa‘ban sene [1]216