İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 74 Hüküm no: 11 Orijinal metin no: [2a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeyneb bt. Ali’nin Mustafa b. Mehmed’e karşı açtığı ıskat-ı cenîn (Çocuk düşürme) davası Sakat da‘vâsıyla mu‘ârazadan men‘ Ma‘rûz Anadolu’da Yozgat kasabası sâkinelerinden sâhibe-i arzuhâl mua‘rrafetü’z-zât Zeyneb bt. Ali nâm hatun Çarşamba günü dîvân-ı âlîlerinde ve ba‘dehû dâ‘îhânemizde ma‘kūd meclis-i şer‘-i münîrde Çankırı kazâsı ahâlîsinden arzuhâlde mezkûr Mustafa b. Mehmed mahzarında ben bundan akdem kârbân ile İslâmbol’a gelir iken esnâ-yı rahta Hendek civârında mer‘ada mezbûr Mustafa âsâ ve odun ile a‘zâlarıma bi-gayr-ı hakkın darbetmekle darb-ı mezkûrdan nâşî zevc-i mutallakım gāib ani’l-meclis İbrahim’in firaşından hâsıl üç aylık bir cenîn-i meyyit ilkā etmemle mûceb-i şer‘îsini talep ederim deyü ba‘de’d-da‘vâ ve’l-inkâr müdde‘iye-i mezbûre ber-minvâl-i muharrer müdde‘âsını isbât için kirâren ve mirâren lede’l-istimhâl ve’l-imhâl her birinde müddet-i mehl-i şer‘î mürûr edip mûcebince müdde‘iye-i mezbûre Zeyneb Hatun da‘vâ-yı mezkûresiyle mezbûr Mustafa’ya bilâ-beyyine mu‘ârazadan men‘ olunduğu İslâmbol Mahkemesi’nden huzûr-ı âlîlerine i‘lâm olundu. Fî-16 min-Şa‘ban sene [1]216