İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 75 Hüküm no: 12 Orijinal metin no: [2b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Mehmed Emin Efendi’nin yıkılan menzili tekrar binâ edeceği Keşf-i arsa Ma‘rûz Sâdır olan fermân-ı âlîlerine imtisâlen zikri âtî husûsun mahallinde bi’l-mu‘âyene istimâ‘ ve fasl ve hasmı için kıbel-i şer‘den mürsel kâtib-i sâni Merhabâzâde Mahmud Efendi hâssa mimarı hulefâsından İsmail ve Ahmed halîfeler ile İstanbul’da Sultan Hamamı kurbünde Hoca Kasım Gönânî Mahallesi’nde vâki‘ münâza‘un fîh olan bir bâb münhedim menzil arsasına varıp cerîdede mazbûtü’l-esâmî Müslimîn huzûrlarında akd-i meclis-i şer‘-i âlî ettikde merhûm el-Hâc Mehmed Emin Efendi nâm sâhibü’l-hayr vakfının bi’l-meşrûta mütevellîsi mevâlî-i izâmdan sâbıkā Halebü’ş-şehbâ kādısı sâhib-i arzuhâl Turşucuzâde es-Seyyid Abdurrahim Efendi meclis-i ma‘kūd-ı mezkûrda derûn-ı arzuhâlde ismi mezkûr Anadolu muhâsebesi kalemi kîsedârı Uncuzâde Mehmed Emin Efendi b. Ahmed tarafından vekîl olduğu Süleyman b. Feyzullah ve es-Seyyid Mehmed b. Mehmed Tahir şehâdetleriyle sâbit olan Hâfız Hüseyin Efendi b. Mehmed mahzarında mütevellîsi olduğum vakf-ı mezkûr musakkafâtından olup işbu derûnunda akd-i meclis olunan arsa üzerinde mebna olan fevkānî bir bâb oda ve bir sofa ve dehliz tahtında bir kârgîr matbah ocağını müştemil ebniyeyi müvekkil-i merkūm Mehmed Emin Efendi hedm ve enkāzını istihlâk etmekle ba‘de’l-keşf mebniyyen kıymetini tazmîn taleb ederim deyü bi’t-tevliye da‘vâ ettikde vekîl-i mezbûr dahi cevâbında mütevellî-i mûmâ-ileyhin ber-vech-i muharrer müdde‘âsını ikrâr u i‘tirâf etmekle tarefeynin tasdîkleri üzere ebniye-i muharrere-i mezkûrenin mahallini mi‘marân-ı mezbûrân mesâha eylediklerinde ebniye-i muharrere-i mezkûre mahalli terbî‘an yetmiş zirâ on parmak olup ebniye-i mezkûre mebniyyen kıymeti altışar guruş olduğunu mi‘marân-ı mezkûrân inhâ eylediklerini mahallinde ba‘de’t-tahrîr meclis-i şer‘a gelip mütevellî-i mûmâ-ileyh ile asîl-i merkūm Mehmed Emin Efendi muvâcehelerinde inhâ ve takrîr eyledikde ebniye-i mezkûrenin mebniyyen kıymeti olan cem‘an dört yüz kırk sekiz guruş otuz para ile ke’l-evvel binâ etmek üzere mütevellî-i mûmâ-ileyh merkūm Mehmed Emin Efendi’ye emr ve tevkîl eylediğinde ol dahi kabûl ve işbu târih-i i‘lâm senesi Şevvâli’l-mükerreminin onuncu günü binâya şürû‘ ve kadîmîsi üzere binâ ve tekmîle ta‘ahhüd edip bu vechile kat‘-i nizâ‘ eyledikleri İstanbul mahkemesinden huzûr-ı âlîlerine i‘lâm olundu. Fî-10 min Ş sene [1]216