İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 76 Hüküm no: 14 Orijinal metin no: [2b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Hüseyin b. Seyyid Ali’nin menzil davasında Seyyid Murtaza ile sulh oldukları Menzil da‘vâsından 40 guruşa sulh Ma‘rûz Rumeli’de Yanya kasabası ahâlîsinden sâhib-i arzuhâl es-Seyyid Hüseyin b. es-Seyyid Ali meclis-i şer‘-i münîrde Rumeli kuzâtından arzuhâlde mezkûr es-Seyyid Murtaza Efendi b. es-Seyyid Ömer mahzarında kasaba-i mezbûrede Saray Mahallesi’nde vâki‘ etrâf-ı erba‘adan merkūm es-Seyyid Murtaza Efendi ve Yusuf Efendi menzilleri ve sazlık ve tarîk-i âm ile mahdûd bir bâb mülk menzilimi zevcem Fâtıma bt. Arslan nâm hatun ben diyâr-ı âharda iken merkūm es-Seyyid Murtaza Efendi’ye fuzûlen bey‘ ve teslîm edip lâkin ben bey‘ini mücîz olmamamla menzil-i mezkûrdan keff-i yed ve mahallinde bana teslîme merkūm es-Seyyid Murtaza Efendi’ye tenbîh olunmak murâdımdır deyü da‘vâ eylediğimde ol dahi cevâbında sen menzil-i mahdûd-ı mezkûru târih-i i‘lâmdan on sekiz sene mukaddem zevcen mezbûre Fâtıma’ya semen-i ma‘lûma bey‘ ve teslîm ol dahi iştirâ ve kabz ile eylediğinden sonra zevcen mezbûre dahi üç sene mukaddem menzil-i mezkûru iki bin sekiz yüz guruşa bana bey‘ ve teslîm ben dahi iştirâ ve kabz etmişdim deyü vaz‘-ı yedini ikrâr-birle beni def‘e tasaddî etmekle bu vechile beynimizde ba‘de vukū‘u’l-münâza‘a bâ-tavassut-ı muslihîn ben tasaddî eylediğim da‘vâ-yı mezkûrumdan merkūm es-Seyyid Murtaza Efendi ile kat‘an li’n-nizâ‘ kırk guruş bedel-i makbûza ba‘de akdi’l-musâlahati ve’l-kabûl menzil-i mahdûd-ı mezkûra ve bedel-i sulh-i merkūma ve işbu târih-i i‘lâma gelince bi’l-cümle sâir hukūk-ı şer‘iyyeye müte‘allika âmme-i de‘âvi ve mütâlebât ve kâffe-i eymân ve muhâsamâtdan her birimiz âharın zimmetini ibrâ-yı âmm-ı sahîh-i şer‘î ile ibrâ ve iskāt ve her birimiz ber-vech-i muharrer âharın ibrâsını kabûlle kat‘-ı nizâ‘ eyledik deyü ikrâr ve tasdîkleri tescîl ve İslâmbol Mahkemesi’nden huzûr-ı âlîlerine i‘lâm olundu. Fî-22 min-Şa‘ban sene [1]216