İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 80 Hüküm no: 19 Orijinal metin no: [3a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Reis b. Abdullah’ın, Nikagos v. Begos zimmî ile alacak davasında sulh oldukları Ma‘rûz Yalâkabad kazâsı ahâlîsinden sâhib-i arzuhâl Mehmed Reis b. Abdullah meclis-i şer‘-i münîrde arzuhâlde ismi mastûr Etmekçi Nikogos v. Bogos zimmî muvâcehesinde mersûm Nikogos zimmî zimmetinde bin iki yüz on dört senesi hilâlinde yedimden ve malımdan iştirâ ve kabz eylediği iki yüz doksan üç çeki hatab semeninden alacağım olan dört yüz sekiz guruşun yedi guruşunu bana edâ etmekle bâkīsi olan dört yüz bir guruşu mersûm Nikogos zimmîden hâlâ taleb ederim deyü da‘vâ eylediğimde ol dahi cevâbında ber-vech-i muharrer müddeâmı inkârından mâ‘adâ yedime i‘tâ eylediğin işbu bir kıt‘a kat‘-ı alâka tahvîli nâtık olduğu üzere işbu târih-i i‘lâm senesi Rebî‘ulevvelinin on altıncı gününe gelince beynimizde cereyân eden bi’l-cümle ahz u i‘tâya müte‘allika âmme-i da‘vâdan benim zimmetimi ibrâ ve iskāt etmişidin deyü beni def‘a tasaddî etmekle bu vechile beynimizde ba‘de vukū‘ı’l-münâza‘a bâ-tavassut-ı muslihîn ben tasaddî eylediğim da‘vâ-yı mezkûremden mersûm Nikogos zimmî ile kat‘un li’n-nizâ‘ yirmi beş guruş bedel-i makbûza ba‘de akdi’l-musâlahatin ve’l-kabûl ziyâde müdde‘âma ve bi’l-cümle sâir hukūk-ı şer‘iyyeye müte‘allika âmme-i de‘âvi ve kâffe-i mütâlebâtdan mesfûr Nikogos zimmînin zimmetini kabûlü hâvi ibrâ-yı âmm-ı sahîh-i şer‘î ile ibrâ ve iskāt eyledim ba‘de’l-ikrâr ve’t-tasdîk bu vechile külliyen kat‘-ı nizâ‘ eyledikleri İslambol mahkemesinden huzûr-ı âlîlerine i‘lâm olundu. Fî-21 min Ş sene [1]216