İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 81 Hüküm no: 21 Orijinal metin no: [3b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tütüncü Avakim’in, Duhânî Hacı İsmail’e olan borcunu ödemesi 579 guruş hüküm Ma‘rûz Arzuhâlde mezkûr Duhânî el-Hâc İsmail b. İbrahim meclis-i şer‘-i münîrde arzuhâl eden Tütüncü Avakim zimmî muvâcehesinde mersûm Avakim zimmî zimmetinde cihet-i karzdan yedi yüz beş guruş ve ma‘lûmü’l-vezn ve’l-kıyye duhân semeninden üç yüz otuz altı guruş ki ciheteyn-i mezkûreteynden cem‘an bin otuz beş guruş alacağım olup hatta mersûm Avakim zimmî meblağ-ı mecmû‘-ı mezkûr bana deyni olduğunu bin iki yüz on dört senesi Şa‘banının yirmi beşinci günü ikrâr ve yedime işbu bir kıt‘a deyn temessükü i‘tâ eylediğinden sonra meblağ-ı mezkûrun dört yüz altmış beş guruşunu bana edâ etmekle bâkīsi olan beş yüz yetmiş dokuz guruşu hâlâ taleb ederim deyü da‘vâ ettikde ol dahi cevâbında ikrâr-ı deyn ve temessük-ı mezkûr kendinin olduğunu i‘tirâf edip lâkin meblağ-ı mezkûrun yedi yüz beş guruşu deynim olup ve üç yüz otuz altı guruşluk duhânı ben iştirâ etmeyip deynim yok iken kâziben ikrârında kazib ve kendisi da‘vâ-yı mezkûresinde mübtil olmadığına müdde‘î-i merkūm el-Hâc İsmail’e yemîn verilmeğin mersûm Avakim zimmînin ikrârı mûcebince meblağ-ı bâkī-i mezkûr beş yüz yetmiş dokuz guruşu müdde‘î-i merkūm el-Hâc İsmail’e edâ ve teslîme mersûm Avakim zimmîye tenbîh olunduğu İstanbul Mahkemesi’nden huzûr-ı âlîlerine i‘lâm olundu. Fî-22 min-Şa‘ban sene [1]216