İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 82 Hüküm no: 22 Orijinal metin no: [3b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim b. Hasan’ın, Mehmed Şâkir Ağa’ya borcunu ödemesi gerektiği Ma‘rûz Mahrûse-i Edirne’de Evliya Kasımpaşa Mahallesinde sâkin iken bundan akdem vefât eden Yakub Ağa b. Ahmed’in sulbî oğlu ve hasran vârisi olan el-Hâc Mehmed Şâkir Ağa meclis-i şer‘-i münîrde Havâss-ı Refî‘a kazâsına tâbi‘ Kalfa karyesi ahâlîsinden İbrahim b. Hasan mahzarında babam müteveffâ-i mezbûr Yakub Ağa ile mezbûr İbrahim beynlerinde cereyân eden ahz u i‘tânın hesabını bin iki yüz beş senesi Zilka‘desinin yirmi dokuzuncu günü sahîhan rü’yet eylediklerinde merkūm İbrahim zimmetinde iki bin beş yüz guruş alacağı zuhûr ve meblağ-ı mezkûr zimmetinde deyni olduğunu ikrâr ve târih-i mezkûr ile muvarrah yedine işbu bir kıt‘a deyn temessükü i‘tâ eylediğinden sonra meblağ-ı mezkûrun bin guruşunu zahr-ı temessük nâtık olduğu üzere babam mezbûra hayatında ve sekiz yüz guruşunu ba‘de vefâtihi bana edâ ve teslîm etmekle bâkīsi olan yedi yüz guruşu bi’l-verâse taleb ederim deyü da‘vâ ettikde ol dahi cevâbında mukaddemâ ikrâr-ı deyn ve temessük-ı mezkûr kendinin olduğunu ikrâr u i‘tirâf edip lâkin müteveffâ-i mezbûre deynim olmayıp kâziben ikrâr ve temessük-ı mezkûru vermişdim dedikde merkūm İbrahim ikrârında kâzib olduğunu bilmediğine mezbûr el-Hâc Mehmed Şâkir Ağa’ya ber-nehc-i şer‘î yemîn verilmeğin mûcebince meblağ-ı bâkī-i mezkûr yedi yüz guruşu müdde‘î-i mezbûr el-Hâc Mehmed Şâkir Ağa’ya edâ ve teslîme merkūm İbrahim’e tenbîh olunduğu İstanbul Mahkemesi’nden huzûr-ı âlîlerine i‘lâm olundu. Fî-24 min-Şa‘ban sene [1]216