İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 83 Hüküm no: 23 Orijinal metin no: [3b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Attar esnafından Ali Efendi’nin taahhüdüne aykırı davrandığında başka bir diyara sürüleceği Ma‘rûz İslâmbol’da attârân esnâfının bâ-berât kethüdâları olan Ömer Ağa ve Mısırçarşısı attârlarından el-Hâc Ali Ağa ve Mehmed Ağa ve es-Seyyid Mehmed Said Ağa ve el-Hâc Halil Ağa ve Ahmed ve es-Seyyid Mustafa Çelebi ve Yusuf ve Mehmed Emin ve Yiğitbaşı el-Hâc Abdi ve diğer Abdullah ve es-Seyyid Abdullah vesâirleri meclis-i şer‘-i münîrde kuzâtdan Ali Efendi b. Ali mahzarında Kahveci Abdülkerim b. Hüseyin nâm kimesne hâzır olduğu hâlde Ayasofya-i Kebîr Câmi‘-i şerîfi havlusunun Zincirlikapısı karşısında kâin bir bâb attâr ve kahveci dükkânının gediğine merkūm Ali Efendi mâlik ve mutasarrıf olmağın hâzır-ı merkūm Abdülkerim’i kendiye teşrîk ve dükkân-ı mezkûrda iskân etmekle bey‘u şirâ edip lâkin bundan akdem işbu hâzır bi’l-meclis el-Hâc Hasan Ağa nâm kimesnenin tevzî‘ olunan kahveden dükkân-ı mezkûra isâbet eden ma‘lûmü’l-miktâr kahve semeninin eceli hulûl etmekle mütâlebe eylediğimizde merkūm Ali Efendi edâdan imtinâ‘ ve itâle-i lisân edip nizâmımıza muhil harekette bulunmağla merkūmdan bir türlü hoşnûd ve râzı değilleriz deyü her biri teşekkî etmeleriyle fîmâ ba‘d merkūm Ali Efendi dükkân-ı mezkûrda sâkin olmayıp şerîki mezbûr bey‘ u şirâ ve umûr-ı esnâfa karışmamak üzere ta‘ahhüd ve hilâf-ı ta‘ahhüdü harekette bulunur ise diyâr-ı âhara nefy ile tedibe râzı olduğu İslambol mahkemesinden huzûr-ı âlîlerine i‘lâm olundu. Fî-22 min Ş sene [1]216