İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 83 Hüküm no: 24 Orijinal metin no: [4a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kırımlı Hacı Abdullah’ın Fıçıcılık sanatını icra etmesine izin verildiği İnhisâr-ı madde-i ticâret bâ-hatt-ı hümâyûn-ı adalet-makrûn memnû‘ olup efendi-i müşârun-ileyhin işbu i‘lâmları mefhûmu şer‘-i kavîme mutâbık ve hatt-ı şerîf-i merâhim-redîf mazmûnuna muvâfık olmağla mûcebince amel olunmak ve hilâfı esnâf-ı merkūme taraflarından vakten mine’l-evkāt hareket vukū‘u tecvîz olunmamak buyruldu. Fî-28 Ş sene [12]16 Kırımî Fıçıcı el-Hâc Abdullah’a san‘at için izni hâvi i‘lâm Ma‘rûz Kırım ahâlîsinden olup Âsitâne-i aliyyede tavattun eden el-Hâc Abdullah b. el-Hâc İsmail meclis-i şer‘-i münîrde fıçıçı esnâfından varilcibaşı Dimitri ve ihtiyârlarından Aleksi ve Yoseb ve Yorgi ve Ziso ve diğer Yorgi muvâcehelerinde esnâf-ı mezbûre üzerine me’mur İsmail Çavuş hâzır olduğu hâlde takrîr-i kelâm edip ben fi’l-asl Kırım diyârında Fıçıcılık san‘atıyla ta‘ayyüş eder makūlesinden olup diyârımız küffâr yedinde olduğundan nâşî bu esnâda terk-i diyâr ve vatan birle ıyâl ü evlâdımdan mufârakat ve Der-aliyye’de ikāmet etmemle kadîmü’l-eyyâmdan beri ve me’lûf olduğum Fıçıcılık san‘atını i‘mâl ve ta‘ayyüş etmek için bir münâsib mahalde Fıçıcı dükkânı tedârik ve küşâd murâd eylediğimde esnâf-ı mezbûre bî-vech müdâhale ve mümâna‘at ederler suâl olunup vâki‘ olan müdâhaleleri men‘ ü def‘ ve san‘at-ı mezkûre ile ta‘ayyüş etmek için dükkân küşâdıma izin ve ruhsat verilmek matlûbumdur dedikde hakīkat-i hal minvâl-i muharrer üzere olduğunu esnâf-ı mezbûre dahi ikrâr etmeleriyle vâkı‘an mezbûr el-Hâc Abdullah garîbü’d-diyâr ve san‘at-ı mezkûrda mahâreti âşikâr olup bir kimesneyi ticâretten men‘ gayr-ı meşrû‘ ve inhisâr-ı bey‘ u şirâ bâ-hatt-ı hümâyûn-ı adâlet-makrûn merfû‘ olmağla mezbûr el-Hâc Abdullah sâye-i inâyet-vâye-i Hazret-i Zıllulâhî’de me’lûf olduğu san‘atla kisb ve ticâret ve istihsâl-i esbâb-ı refâhiyet-birle ta‘ayyüşü emr-i savâb ve san‘at-ı mezkûreden men‘ olunduğu hâlde ta‘ayyüşe muktedir olmayıp zell-i suâle mübtelâ olacağı âşikâr olmağın mezbûr el-Hâc Abdullah dilediği mahalde Fıçıcı dükkânı küşâd ve san‘at-ı mezkûresini i‘mâl eylemesine esnâf-ı mezbûre mümâna‘at etmemeleri için kıbel-i şer‘den her birine tenbîh olundukda onlar dahi mezbûr el-Hâc Abdullah’ı kabûl eyleyip ba‘de’l-yevm mezbûr el-Hâc Abdullah’ı san‘at-ı mezkûresini işleyip ticâret etmekten men‘ etmemeğe her biri ta‘ahhüd etmeleriyle mezbûr el-Hâc Abdullah’ın dilediği mahalde Fıçıcı dükkânı küşâd ve san‘at-ı mezkûresini i‘mâl ve ibâdullâha bey‘-birle ticârete izin ve ruhsatı hâvi ve esnâf-ı mezkûrenin adem-i mümâna‘atına ta‘ahhüdlerini muhtevî emr-i âlîleri sudû[r]-ı re’y-i rezîn-i âsafânelerine menût olduğu İstanbul Mahkemesi’nden huzûr-ı âlîlerine i‘lâm olundu. Fî-28 Ş sene 1216