İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 84 Hüküm no: 25 Orijinal metin no: [4a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Ayşe Hatun’un, Emine bt. Mehmed’deki alacağını taksite bağladığı Taksît Ma‘rûz Mua‘rrefetü’z-zât Şerîfe Hediye nâm-ı diğer Emine bt. Mehmed nâm hatun meclis-i şer‘-i münîrde kezâlik zâtı mu‘arrefe Şerîfe Âişe bt. Mehmed nâm hatun mahzarında mezbûre Şerîfe Âişe Hatun’a bâ-i‘lâm-ı şer‘î mahkûmün-bih yüz yetmiş üç buçuk guruş ve bir gömlek semeninden dahi on dört guruş ki cem‘an yüz seksen yedi buçuk guruş deynim olup lâkin deyn-i mezkûrumu hâlen ve def‘aten edâya iktidârım olmamağla meblağ-ı mezkûrun yetmiş üç buçuk guruşunu târih-i i‘lâm senesi Ramazan-ı şerîfinin on beşinci günü ve bâkī yüz on dört guruşunu dahi târih-i mezkûrdan beher şehr kendüye onar guruş vermekle on bir ay on iki gün tamamında edâ etmek üzere te’cîl ve taksîte tâlibe olduğumda ol dahi ber-vech-i muharrer beni te’cîl ve taksît eyledi deyü takrîrini mezbûre Şerîfe Âişe Hatun tasdîk eylediği İslambol Mahkemesi’nden huzûr-ı âlîlerine i‘lâm olundu. Fî-25 min-Şa‘ban sene [1]216