İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 87 Hüküm no: 30 Orijinal metin no: [4b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zenciye Mahbûbe bt. Abdullah’ın efendisine itâat etmesi gerektiği Rıkka inkıyâdına tenbîh Ma‘rûz Sâbıkā rıkka inkıyâdını mu‘terife ve ber-vech-i âtî da‘vâya kıbel-i şer‘den me’zûne olan Zenciye Mahbûbe bt. Abdullah meclis-i şer‘-i münîrde rakīka câriyesi olmak üzere kendiye vaz‘-ı yedi mütehakkık olan Esirci Hasan b. Mehmed mahzarında ben bundan akdem işbu hâzır bi’l-meclis Çukadâr es-Seyyid Ali b. Ali’nin yedinde câriye-i memlûkesi iken târih-i i‘lâmdan üç buçuk sene mukaddem İslâmbol’da Kumkapı kurbünde İbrahim Paşa Mahallesi’nde sâkin olduğu menzilde malından beni tahrîr ve i‘tâk edip bu vechile ben hürre olmuş iken mezbûr Hasan rakīka câriyesi olmak üzere bi-gayr-ı hakkın vaz‘-ı yed etmekle suâl olunup kasr-ı yedine tenbîh ve sebîlim tahliyye olunması murâdımdır deyü da‘vâ ettikde ol dahi cevâbında müdde‘iye-i mevsûfe-i mezbûreyi târih-i i‘lâmdan beş ay mukaddem Mısırlı el-Hâc Hüseyin nâm kimesneden yedinde rıkka münkāde câriyesi olmak üzere altı yüz beş guruş semen-i medfû‘ ve makbûza iştirâ ve kabz etmemle ol vechile vaz‘-ı yed ederim deyü vaz‘-ı yedini ikrâr ve ber-vech-i muharrer hürriyet-i müdde‘âsını inkâr etmekle müdde‘iye-i mavsûfe-i mezbûre ber-minvâl-i muharrer müdde‘âsını isbât için kirâr ve mirâr lede’l-istimhâl ve’l-imhâl bir vechile ityân-ı beyyine[ye] kādire olmamağla talebiyle mevlâsı merkūm Hasan’a ber-nehc-i şer‘î yemîn verilmeğin mûcebince müdde‘iye-i mevsûfe-i mezbûre Mahbûbe da‘vâ-yı mezkûresiyle bilâ-beyyine mu‘ârazadan ba‘de’l-men‘ mevlâsı merkūm Hasan’a kemâ-fi’s-sâbık rıkka inkıyâdına mezbûre Mahbûbe’ye tenbîh olunduğu İslambol mahkemesinden huzûr-ı âlîlerine i‘lâm olundu. Fî-29 min-Şa‘ban sene [1]216