İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 88 Hüküm no: 31 Orijinal metin no: [5a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kalyoncu Seyyid Süleyman’ın, alacak davasında Tığcı Osman ile sulh olduğu Gabn-i fâhiş da‘vâsından 10 guruşa sulh Ma‘rûz Kalyonî es-Seyyid Süleyman b. Ahmed meclis-i şer‘-i münîrde Tığcı Osman b. İbrahim mahzarında târih-i i‘lâmdan üç sene mukaddem mezbûr Osman yedinden iktirâz ve kabz eylediğim yüz kırk beş guruş deynim mukābelesinde yedimde malım olan İstanbul’da Mercan Sokağında vâki‘ bir bâb tığcı dükkânı derûnunda mevcûde beyne’l-esnâf gedik tâ‘bir olunan bir kürk ve bir örs ve altı çekiç vesâir âlât-ı lâzıme-i ma‘lûmeyi bi-tarîkı’l-istiğlâl mezbûr Osman’a bey‘ ve teslîm ol dahi iştirâ ve kabz etmişdi el-hâletü hâzihi bey‘-i mezkûr hakīkatde bey‘ olmayıp hükm-i rehinde olmağla deyn-i mezkûrumu edâ ile âlât-ı mezkûreyi rehniyetden fek ve bana teslîme mezbûr Osman’a tenbîh olunmak murâdımdır da‘vâ eylediğimde ol dahi cevâbında âlât-ı gedik-i mezkûru yüz altmış beş guruş semen-i makbûz mukābelesinde bâten ve sahîhan bana bey‘ ve teslîm ben dahi iştirâ ve kabz eylediğimden sonra mebî‘-i mezkûrun tağrîr ve gabnine müte‘allika da‘vâdan benim zimmetimi ibrâ ve iskāt etmişdin deyü beni def‘a tasaddî etmekle beynimizde ba‘de vukū‘ı’l-münâza‘a ben tasaddî eylediğim da‘vâ-yı mezkûremden mezbûr Osman ile on guruş bedel-i makbûza ba‘de akdi’l-musâlahati ve’l-kabûl husûs-ı mezkûra ve bedel-i sulh-i merkūma vesâire müte‘allika âmme-i da‘vâdan her birimiz âharın zimmetini ibrâ ve iskāt ve her birimiz ber vech-i muharrer âharın ibrâsını kabûl eyledik deyü ba‘de’l-ikrâr ve’t-tasdik bu vechile kat‘-i nizâ‘ eyledikleri İstanbul Mahkemesi’nden huzûr-ı âlîlerine i‘lâm olundu. Fî-29 min-Şa‘ban sene [1]216