İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 88 Hüküm no: 32 Orijinal metin no: [5a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarrac Mustafa b. Süleyman’ın, Dellal Yako v. Yoda aleyhine açtığı davada iddiasını ispat edemediğinden muarazadan men edildiği 180 [guru]şa hüküm Ma‘rûz Sarrac Mustafa b. Süleyman nâm kimesne meclis-i şer‘-i münîrde Dellâl Yako v. Yoda nâm Yahûdi muvâcehesinde târih-i i‘lâmdan iki ay mukaddem yedimde malım olan işbu meclis-i şer‘de mevcûd ma‘den-i kabre ile masnû‘ müfreş tâ‘bir olunur garârı yüz seksen guruşa mersûm Yako Yahûdi’ye bey‘ ve teslîm ol dahi iştirâ ve kabz ve kabûl etmekle semeni olan meblağ-ı mezkûr yüz seksen guruşu mesfûr Yako Yahûdiden hâlâ taleb ederim deyü da‘vâ ettikde ol dahi cevâbında müdde‘î-i merkūm zikr olunan gırârı ol mikdâr guruşa bey‘ ediver deyü bana vermişti deyip müdde‘î-i mezbûrun bey‘ u şirâ müdde‘âsını inkâr etmekle müdde‘î-i mezbûr ber-vech-i muharrer müdde‘âsını beyâna havâle olundukda ityân-ı beyyineden ızhâr-ı acz ve istihlâf ettikde mersûm Yako Yahûdi’ye vech-i şer‘î üzere yemîn verilmeğin mûcebiyle müdde‘î-i merkūm Mustafa da‘vâ-yı mezkûresiyle mersûm Yako Yahûdi’ye bilâ-beyyine mu‘ârazadan ba‘de’l-men mesfûr Yako Yahûdi yedinde emânet olan garâr-ı mezkûru müdde‘î-i merkūma teslîm ol dahi kabz eylediği tescîl ve İstanbul Mahkemesi’nden huzûr-ı âlîlerine i‘lâm olundu. Fî-29 Şa‘ban sene [1]216