İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 89 Hüküm no: 33 Orijinal metin no: [5a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gariboğlu Yanaki’nin, Seyyid Mustafa’dan alacağına kardeşi Seyyid Mehmed’in kefil olduğu 150 [guru]ş hüküm Ma‘rûz Rusya elçisinin işbu memhûr arzuhâlinde mastûr Gariboğlu Yanaki Tercümanı Danderya hâzır olduğu hâlde meclis-i şer‘-i münîrde arzuhâlde mezkûr es-Seyyid el-Hâc Mustafa’nın li-ebin karındaşı es-Seyyid Mehmed b. Ali mahzarında mezbûr es-Seyyid el-Hâc Mustafa zimmetinde yedime verdiği işbu sene-i mübâreke Rebî‘ülâhirinin üçüncü günü târihiyle muvarrah bir kıt‘a temessük mantûkunca cihet-i havâleden alacağım olan üç bin beş yüz guruşun iki bin iki yüz elli guruşunu mezbûr es-Seyyid el-Hâc Mustafa bana edâ ve teslîm eylediğinden sonra bâkīsi olan bin iki yüz elli guruşa merkūm es-Seyyid Mehmed kefîl ve zâmine olmağla meblağ-ı mezkûru kefâletine binâen taleb ederim deyü da‘vâ eylediğimde ol dahi cevâbında ber-vech-i muharrer müdde‘âmı ikrâr ve meblağ-ı mezkûru târih-i i‘lâmdan doksan bir gün mürûrunda edâ etmek üzere istimhâl eylediğimde ben dahi rızâmla imhâl ve tecil eyledim deyü takrîrini mezbûr es-Seyyid Mehmed ba‘de’t-tasdîk mezbûr es-Seyyid Mehmed’in cihet-i kefâletinden deyni olan meblağ-ı mezkûr bin iki yüz elli guruşa hâzır bi’l-meclis Attâr es-Seyyid Mustafa b. es-Seyyid Ali ber-vech-i muharrer müeccelen kefîl ve zâmin oldukda ol dahi kefâletini kabûl eylediği tescîl ve İslambol Mahkemesi’nden huzûr-ı âlîlerine i‘lâm olundu. Fî-29 min Ş sene [1]216