İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 89 Hüküm no: 34 Orijinal metin no: [5a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Abdurrahman Çelebi ile Seyyid Mehmed ‘in alacak davasında sulh olduğu 150 [guru]şa hüküm Ma‘rûz Sâhib-i arzuhâl es-Seyyid Abdurrahman Çelebi b. es-Seyyid Mustafa meclis-i şer‘-i münîrde zikri âtî gedik âlâtına vaz‘-ı yedi mütehakkık olan haffâf es-Seyyid Mehmed b. es-Seyyid Hasan muvâcehesinde mezbûr es-Seyyid Mehmed yedimde mülküm olan İstanbul’da Tahtakale kurbünde haffâflar sûkunda vâki‘ bir bâb haffâf dükkânı derûnunda mevcûde beyne’l-esnâf gedik tâ‘bir olunur âlât-ı lâzıme ve eşyâ-i ma‘lûmeyi ben diyâr-ı âharda iken fuzûlî zabt etmekle âlât-ı mezkûreden keff-i yedine tenbîh olunmak matlûbumdur deyü tasaddî eylediğim da‘vâmdan bâ-vesâtet-ı muslihîn mezbûr es-Seyyid Mehmed ile kat‘an li’n-nizâ‘ yüz elli guruş bedel-i makbûza sulh olduğumda ol dahi sulh-i mezkûru ba‘de’l-kabûl husûs-ı mezkûra ve bedel-i sulh-ı mezbûra vesâire müte‘allika âmme-i da‘vâdan mezbûr es-Seyyid Mehmed’in zimmetini kabûlü hâvi ibrâ ve iskāt eyledim deyü ikrâr ve tasdîkleri tescîl ve İslâmbol Mahkemesi’nden huzûr-ı âlîlerine i‘lâm olundu. Fî-selh-i Ş sene [1]216