İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 90 Hüküm no: 35 Orijinal metin no: [5a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kostandi ve Yorgi’nin Tavşan Adası’nda doğramacılık sanatını icra etmelerine izin verildiği Tavşan doğramacıların ruhsatı Ma‘rûz Bahr-ı sefîd’de vâki‘ Tavşan Adası re‘âya Kostandi ve Yorgi veledey. Kasber nâm zimmîler meclis-i şer‘-i münîrde her biri takrîr-i kelâm edip biz ada-i mezkûre re‘âyasına mensûb olan doğramacılık san‘atında kesb-i mahâret edip dükkân küşâd ve i‘mâl ile ta‘ayyüş murâd eylediğimizde esnâf-ı mezkûreden bazıları mümâna‘at etmeleriyle dükkân güşadımıza taraf-ı şer‘den izin ve ruhsat verilmesi murâdımızdır deyü takrîrleri şer‘-i şerîfe mutâbık ve men-‘i inhisâr bey‘ u şirâ bâbında sâdır olan hatt-ı hümâyûna muvâfık olmağla fîmâ ba‘d esnâf-ı mezkûrenin vâki‘ olan müdâhaleleri men‘ ü def‘ olunup mersûmân Kostandi ve Yorgi zimmîler birer bâb doğramacı dükkânı küşâd ve san‘at-ı mezkûreyi i‘mâllerine izin ve ruhsatı hâvi emr-i âlîleri sudûru iktizâ eylediği İslâmbol Mahkemesi’nden huzûr-ı âlîlerine i‘lâm olundu. Fî-24 min-şehri Ramazani’l-mübârek sene [1]216