İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 90 Hüküm no: 36 Orijinal metin no: [5b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Çelebi’nin, Mehmed Ağa b. İbrahim’in arsasına geçen binâ saçaklarını ve pencerelerini kaldırarak sulh oldukları Keşf-i şehnişîn Ma‘rûz Sâdır olan fermân-ı âlîlerine imtisâlen zikri âtî husûsun mahallinde bi’l-mu‘âyene istimâ‘ ve fasl ve hasmı için kıbel-i şer‘den mürsel kâtib-i sâni Merhabâzâde Mahmud Efendi hâssa mimarı hulefalarından Halil ve İsmail ve Mustafa Halîfeler ile İstanbul’da Hocapaşa kurbünde Elvanzâde Mahallesi’nde vâki‘ münâza‘un fîh olan tarîk-i has üzerine varıp cerîdede mazbûtü’l-esâmî Müslimîn huzûrlarında akd-i meclis-i şer‘-i kavîm eyledikde hâssa hasekilerinden sâhib-i arzuhâl Hazinedâr Mehmed Ağa b. İbrahim ve vâlidesi Habîbe bt. Ahmed nâm hatun taraflarından husûs-ı âti’l-beyânda vekîl olduğu zât-ı mezbûreyi ârifân hâssa hasekilerinden Hüseyin Ağa b. Ali ve Mehmed Sâdık Ağa b. Mehmed şehâdetleriyle sâbit olan haseki hâssa Yazıcı Hâfız Mahmud Ağa b. İbrahim meclis-i ma‘kūd-ı mezkûrda derûn-ı arzuhâlde ismi mezkûr Berber Hasan Çelebi b. Mehmed mahzarında müvekkillerim mezbûrân Mehmed Ağa ve vâlidesi Habîbe Hatun işbu mu‘âyene olunan bir bâb muhterik mülk menzil arsasına mâlike olan gāibeti ani’l-meclis Zeliha Hanım’dan iki yüz zirâ‘ arsa ile kezâlik mülkü olan işbu tarîk-i hâssın ancak elli zirâ‘ havâsını semen-i ma‘lûme iştirâ edip bu vechile bâ-hüccet yedlerinde mülkleri olmağla tarîk-i hass-ı mezkûr üzerine mezbûr Hasan Çelebi hulefâ-i merkūmûnun mesâhaları üzere tûlen beş zirâ‘ ve arzan on sekiz parmak ve yine tûlen dokuz zirâ‘ arzan on sekiz parmak iki aded şehnişîn itâle ve menzilinin tabaka-i ulyâda ve vustâsında on bir aded pencere ve kezâlik ulyâda ve vustâda dehlizlerin sekiz aded direk arasını pencere küşâd ve tûlânî yirmi zirâ‘ sekiz parmak tura saçak fuzûlî itâle ve ihdâs etmekle tarîk-i hass-ı mezkûr üzerine fuzûlen ihdâs eylediği şehnişîn ve saçağın hakk-ı kararları olmamağla men‘ ü def‘ olunması müvekkillerim merkūmânın matlûblarıdır deyü da‘vâ eyledikde mezbûr Hasan Çelebi cevâbında kaziyye minvâl-i muharrer üzere olduğunu tasdîk etmekle fuzûlen âharın mülküne itâle ve ihdâs eylediği ebniye ve pencerelerin def‘i iktizâ eylediği merkūm Hasan’a ba‘de’t-tefhîm vekîl-i mezbûr rızâsıyla zikr olunan şehnişînleri ve ulyâda bir direk arası ve vustâda bir direk arası pencereleri açıklık mahallinde vâki‘ olmağla rızâsıyla ibkā ve sâlifü’z-zikr tura saçakları kat‘ olunup bu vechile kat‘-ı nizâ‘ eylediklerini mahallinde ba‘de’t-tahrîr mezbûrân ile meclis-i şer‘a gelip muvâcehelerinde inhâ ve takrîr eylediği İslâmbol Mahkemesi’nden huzûr-ı âlîlerine i‘lâm olundu. Fî-28 min Ş sene [1]216