İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 91 Hüküm no: 37 Orijinal metin no: [5b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Osman’ın satın aldığı kölenin ayıplı çıkması üzerine Seyyid Mustafa’ya geri verilmesi Gulâmı geriye red Ma‘rûz Sâhib-i arzuhâl es-Seyyid Osman b. Süleyman meclis-i şer‘-i münîrde arzuhâlde mezkûr Esirci es-Seyyid Mustafa b. Hüseyin mahzarında târih-i i‘lâmdan dört gün mukaddem mezbûr es-Seyyid Mustafa’dan cemî‘-i uyûbdan sâlime olmak üzere bin iki yüz elli guruş semen-i medfû‘ ve makbûza iştirâ ve kabz eylediğim işbu hâzır bi’l-meclis Osman’ın başında yarası olduğuna vâkıf olup illet-i mezkûre kadîm ve inde’t-tüccâr noksan semen icâb eder uyûbdan olmağla redd-i mebî‘ ve istirdâd-ı semen murâdımdır deyü teveccüh-i husûmet bulundukdan sonra da‘vâ ettikde ol dahi cevâbında gulâm-ı mezkûru müdde‘î-i mezbûra ol mikdâr guruşa bey‘ ve kabz-ı semen eylediğini ikrâr lâkin illet-i mezkûresiyle kabûl etmişdi deyü ba‘de’d-def‘ ve’l-inkâr dâfi‘-i mezbûr ber-vech-i muharrer def‘ime şâhidim yokdur deyü ityân-ı beyyineden ızhâr-ı acz ve istihlâf ettikde mezbûr es-Seyyid Osman’a bi’l-muvâcehe ber-nehc-i şer‘î yemîn verilmeğin mûcebince dâfi‘-i merkūm def‘-i mezkûruyla bilâ-beyyine mu‘ârazadan ba‘de’l-men‘ merkūm es-Seyyid Mustafa’nın ikrâr u i‘tirâfı mûcebiyle gulâm-ı mezbûru geriye ahz ve semeni olmak üzere makbûzu olan bin iki yüz elli guruşu müdde‘î-i mezbûra red ve teslîme merkūm es-Seyyid Mustafa’ya tenbîh olunduğu İslâmbol Mahkemesi’nden huzûr-ı âlîlerine i‘lâm olundu. Fî-3 min-şehr-i Ramazan sene [1]216