İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 92 Hüküm no: 38 Orijinal metin no: [5b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haçador v. Kolican’ın, Sakaoğlu Karabet ve Zador v. Karabet’e borcunu ödemesi gerektiği Deyn-i mezkûrlarını edâya tenbîh Ma‘rûz Tülbentçi esnâfından arzuhâl eden Sakaoğlu Karabet ve Zavor v. Karabet zimmî kendi nefsinden asâleten ve damadı Mıgırdıc v. Kazer zimmî tarafından vekâleti ber-nehc-i şer‘î sâbit olmağla vekâleten ve Bogos v. Bedros ve Ohan v. Agob ve Haçador v. Kalos ve Kirkor v. Artin ve Papaoğlu Mıgırdıc ve Kirkor v. Karabet ve Azer v. Artin ve Haçador v. İvaz ve Kapril v. Manok nâm zimmîler asâleten ve diğer Mıgırdıc v. Kapril nâm zimmî tarafından sâbitü’l-vekâle vekîli Bedros v. Vartan vekâleten meclis-i şer‘-i münîrde arzuhâlde mastûr Haçador v. Kolican nâm zimmî muvâcehesinde mesfûr Sakaoğlu Karabet işbu Haçador zimmî zimmetinde semen-i mebî‘den bin beş yüz elli guruş ve mesfûr Zavor benim dahi iki yüz elli yedi guruş ve damadım müvekkil-i mersûmun üç yüz guruş ve mersûm Bogos benim dahi bin üç yüz on altı guruş ve mesfûr Ohan benim dahi üç yüz guruş ve mersûm Haçador benim dahi bin iki yüz ve mesfûr Kirkor benim dahi sekiz yüz elli guruş ve mersûm Papaoğlu Mıgırdıc benim dahi dört yüz seksen guruş ve mesfûr Kirkor benim dahi üç yüz altmış beş guruş ve mersûm Azer benim dahi sekiz yüz guruş ve mesfûr diğer Haçador benim dahi seksen guruş ve mersûm Kapril benim dahi yüz altmış beş guruş ve mersûm Bedros müvekkilim mesfûr Mıgırdıc zimmînin dahi üç yüz elli guruş eşyâ semenlerinden alacağımız olmağla hâlâ taleb ederiz deyü her biri bi’l-asâle ve bi’l-vekâle ba‘de’d-da‘vâ ve’l-istintak mesfûr Haçador zimmî cevâbında müdde‘ûn-ı mersûmûnun ber-minvâl-i muharrer müdde‘âlarını bi-tamâmihî ikrâr u i‘tirâf etmeğin mûcebince müdde‘ûn-ı mersûmûna ber-vech-i muharrer deyn-i mezkûrlarını edâya mesfûr Haçador zimmîye tenbîh olunduğu İslâmbol Mahkemesi’nden huzûr-ı âlîlerine i‘lâm olundu. Fî-3 min-Ramazan sene [1]216