İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 93 Hüküm no: 39 Orijinal metin no: [5b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İznikli Mustafa Ağa’nın satın aldığı Arab zenciye câriyenin hürriyet davası Kelâmına iltifât olunmadığı Ma‘rûz Mültezim tâifesinden İznikî Mustafa Ağa b. Ali meclis-i şer‘-i münîrde Sarraf Bağdasar v. Ohannes zimmî muvâcehesinde târih-i i‘lâmdan yedi sene mukaddem vilâyetim İznik kazâsından bana bir zenciye câriye alıver deyü mersûm Bağdasar zimmîye emr ve tevkîl eylediğimde ol dahi altı yüz elli guruşa âhardan bir Arab zenciye câriye iştirâ ve bana irsâl ben dahi bir müddet istihdâm eylediğimden sonra câriye-i mezbûreyi Süleyman nâm kimesneye semen-i ma‘lûme bey‘ ol dahi âhara bey‘ ve tedâvül-i eyâdî ile es-Seyyid Ali nâm kimesnenin yedinde iken câriye-i mezbûre hürriyetini da‘vâ ve müdde‘âsını ber-nehc-i şer‘î isbât ve hüküm ve i‘lâm olunmağla mücerred câriye-i mezbûreyi mersûm Bağdasar zimmî tarafımdan vekâleten iştirâ eylediğine binâen semen-i mezkûr altı yüz elli guruşu malından bana zâmin olsun deyü tasaddî eylediği da‘vâsı takrîr-i meşrûhu üzere meşrû‘a olmamağla iltifât olunmadığı İstanbul Mahkemesi’nden huzûr-ı âlîlerine i‘lâm olundu. Fî-5 Ramazan sene [1]216