İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 93 Hüküm no: 40 Orijinal metin no: [6a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Moralı Emine bt. Abdi’nin, Seyyid Ahmed aleyhine açtığı cariye davasında iddiasını ispat edemediğinden muarazadan men edildiği Zenciye câriye da‘vâsıyla mu‘ârazadan men‘ Ma‘rûz Mu‘arrefetü’z-zât Moralı Emine bt. Abdi nâm hatun meclis-i şer‘-i münîrde zikri âtî câriyeye vaz‘u’l-yed olan es-Seyyid el-Hâc Ahmed b. es-Seyyid Abdurrahman mahzarında târih-i i‘lâmdan beş ay mukaddem mezbûr es-Seyyid el-Hâc Ahmed yedinden ve malından iktirâz ve kabz eylediğim üç yüz elli guruş deynim mukābelesinde yedimde rıkka münkāde işbu meclis-i şer‘de mevcûde bir re’s zenciye câriyemi yedine rehin vaz‘ ve teslîm etmişdim el-hâletü hâzihi deynim olan meblağ-ı mezkûru yedimden ahz ve câriye-i mezkûreyi bana teslîme mezbûr es-Seyyid el-Hâc Mehmed’e tenbîh olunmak murâdımdır deyü ba‘de’d-da‘vâ ve’l-istintak ol dahi cevâbında câriye-i hâzıra-i mezbûreyi müdde‘iye-i mezbûre Emine Hatun üç yüz altmış guruşa bana bey‘ ve teslîm ve semenini tamamen kendüye def‘ ve teslîm ol dahi kabz etmişdi deyip bu sûretde bey‘-i beyyinesi evlâ olmağla merkūm es-Seyyid el-Hâc Ahmed ber-vech-i muharrer müdde‘âsını lede’t-tezkiye adl ve makbûlü’ş-şehâde idükleri ihbâr olunan Attâr es-Seyyid Musa b. Feyzullah ve Kayyım Molla Ali b. Mehmed ve Mehmed b. Ahmed ve Hüseyin b. el-Hâc Mehmed nâm kimesneler şehâdetleriyle bi’l-muvâcehe ber-nehc-i şer‘î isbât etmeğin mûcebiyle müdde‘iye-i mezbûre Emine Hatun da‘vâ-yı mezkûresiyle merkūm es-Seyyid el-Hâc Ahmed’e bî-vech mu‘ârazadan men‘ olunduğu İstanbul Mahkemesi’nden huzûr-ı âlîlerine i‘lâm olundu. Fî-5 min-şehr-i Ramazan sene [1]216