İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 94 Hüküm no: 41 Orijinal metin no: [6a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hancı Mehmed b. Mehmed’in Cankulu Mustafa’da alacağının kalmadığı Ma‘rûz Sâhib-i arzuhâl Çukadâr el-Hâc Memiş Ağa b. Memiş nezâret-i Hazret-i Şeyhülislâm -sellemehü- âsûde evkāf müfettişi mevâlî-i izâmdan Faziletlü Mehmed Suedâ Beyefendi dâ‘îleriyle akd olunan meclis-i şer‘-i hatîrde nezâret-i müşârun-ileyhde olan Kaya İsmihan Sultan Vakfı’nın bi’l-meşrûta hâlâ mütevelliyesi olan Hatice Hanım tarafından tasdîka vekîli olan Hancı Mehmed b. Mehmed mahzarında vakf-ı mezkûr musakkafâtından Süleyman Paşa Hânı demekle ma‘rûf hanın ulyâsında vâki‘ bir bâb oda gediğine üç yüz elli guruş icâre-i mu‘accele ve beher mâh icâre-i vâhide-i kadîmesi olan yüz kırk pâre icâre-i vâhide ile bâ-temessük-ı mütevellî ben mutasarrıf iken diyâr-ı âhara âzim olduğumdan icâresini havâle edip ba‘dehû mütevelliye-i mezbûre Hatice Hanım oda-i mezkûre gediğini tarafımdan bâ-mektup emr ve tevkîlim ile Cankulu Mustafa nâm kimesneye ferağ ve meblağ-ı mezkûru benim için kabz etmişdi el-haletü hâzihi müvekkile-i merkūme makbûzu olan meblağ-ı mezkûr üç yüz elli guruşu vekîl-i mezbûr yediyle bana def‘ ve teslîm ben dahi tamamen ba‘de’l-kabz meblağ-ı mezkûrdan müvekkile-i mezbûre yedinde bir akçe ve bir habbe bâkī alacağım ve husûs-ı mezkûra müte‘allika da‘vâ ve nizâ‘ ve husûmetim kalmadı deyü ba‘de’l-ikrâr ve’t-tasdîk bu vechile kat‘-ı nizâ‘ eyledikleri tescîl ve İslâmbol Mahkemesi’nden huzûr-ı âlîlerine i‘lâm olundu. Fî-5 min-Ramazan sene [1]216