İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 95 Hüküm no: 42 Orijinal metin no: [6a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abranoş v. Kirkor’un, Seyyid Mehmed b. Seyyid Mahmud’a borcunu ödemesi gerektiği 865 Guruş hüküm Ma‘rûz Sâhib-i arzuhâl es-Seyyid Mehmed b. es-Seyyid Mahmud meclis-i şer‘-i münîrde arzuhâlde mastûr Abranoş v. Kirkor zimmî muvâcehesinde mersûm Abranoş zimmî ile karındaşı Ebil zimmî bundan akdem yedinden ve malımdan ma‘an iştirâ ve kabz eyledikleri rehâvi çalar bir çekmece sa‘ati semeninden dokuz yüz guruş alacağım olup meblağ-ı mezkûrdan her biri âharın zimmetine lâzım gelen meblağa kefîl ve zâmin olup ve yedime işbu bir kıt‘a deyn temessükü i‘tâ eylediklerinden sonra meblağ-ı mezkûrun otuz beş guruşunu mersûm Abranoş zimmî bana edâ etmekle bâkīsi olan sekiz yüz altmış beş guruşu asâlet ve kefâletine binâen mesfûr Abranoş zimmîden hâlâ taleb ederim deyü da‘vâ ettikde ol dahi cevâbında müdde‘î-i merkūmun ber-vech-i muharrer müdde‘âsını bi-tamâmihî ikrâr u i‘tirâf etmeğin mûcebince meblağ-ı bâkī-i mezkûr sekiz yüz altmış beş guruşu müdde‘î-i merkūm es-Seyyid Mehmed’e edâ ve teslîme mesfûr Abranoş zimmîye tenbîh olunduğu İslâmbol Mahkemesi’nden huzûr-ı âlîlerine i‘lâm olundu. Fî-10 min-şehr-i Ramazan sene [1]216