İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 95 Hüküm no: 43 Orijinal metin no: [6a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sâre bt. Sekyas’ın, Arotin ve Begos aleyhine açtığı davada iddiasını ispat edemediğinden muarazadan men edildiği Mu‘ârazadan men‘ Ma‘rûz Derûn-ı arzuhâlde mastûratü’l-ism Sâre bt. Sekyas nâm Nasrâniyenin oğlu ve tarafından husûs-ı âtî’l-beyânda vekîl olduğu şahsını ârifân İbrahim b. el-Hâc Mustafa ve Ahmed b. Mustafa şehâdetleriyle sâbit olan Sahak v. Abraham nâm zimmî bi’t-terâzi dâ‘îhânemizde ma‘kūd meclis-i şer‘-i hatîrde zikri âtî vakfının mütevellîleri Avanis ve Serkiz nâm zimmîler hâzır oldukları hâlde arzuhâl eden Arotin ve karındaşı Begos v. Arakil nâm zimmîler muvâcehelerinde gallesi Mar Yakob ve diyâr-ı acemde vâki‘ üç aded kilise fukarâlarına mevkūfe vakfından İslâmbol’da Şeyh Ferhad Mahallesi’nde vâki‘ ma‘lûmü’l-hudûd ve’l-müştemilât bir bâb menzile mukaddemâ mutasarrıf olan müvekkilem mezbûrenin karındaşı Avanis v. Sekyas zimmî menzil-i mezkûrun rub‘ hissesini bâ-re’y-i mütevellî müvekkilem mesfûre Sâre Nasrâniyye’ye ferağ ve tefvîz etmişken rub‘-ı menzil-i mezkûru mesfûrân Arotin ve Begos zimmîler bi-gayr-ı hakkın vaz‘-ı yed ederler suâl olunup rub‘-ı menzil-i mezkûrdan kasr-ı yedlerine tenbîh olunmak bi’l-vekâle matlûbumdur deyü da‘vâ ettikde mesfûrân Arotin ve Begos zimmîler cevâblarında arzuhâl hâmişinde mastûr derkenâr nâtık olduğu üzere menzil-i mezkûra mutasarrıf olan mesfûr Avanis zimmî hayatında menzil-i mezkûru âhar kız karındaşları Talta ve Magdisi Karyana Nasrâniyeler ile kız karındaşları kızları Sofya ve Takohi Nasrâniyelere bâ-re’y-i mütevellî ferağ ve tefvîz ettikden sonra mesfûrât dahi mecmû‘-ı menzil-i mezkûru bize ale’l-iştirâki’s-seviyy bâ-re’y-i mütevellî ferağ ve tefvîz etmeleriyle bu vechile vaz‘-ı yed ederiz deyip müdde‘î vekîl-i mezbûrun ber-vech-i muharrer müdde‘âsını her biri inkâr etmeleriyle beyâna ba‘de’l-havâle müddet-i mehl-i şer‘î mürûr edip müdde‘î-i vekîl-i mesfûr ber-vech-i muharrer müdde‘âsına ikāmet-i beyyineye kādir olmayıp bi’t-talep mesfûrân Arotin ve Begos zimmîlere vech-i şer‘î üzere yemîn verilmeğin mûcebince müdde‘î-i vekîl-i mesfûr bi’l-vekâle da‘vâ-yı mezkûresiyle mesfûrân Arotin ve Begos zimmîlere bilâ-beyyine-i âdile bî-vech-i şer‘î mu‘ârazadan men‘ olunduğunu İslâmbol Mahkemesi’nden huzûr-ı âlîlerine i‘lâm olundu. Fî-7 min-Ramazani’l-mübârek sene [1]216