İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 96 Hüküm no: 44 Orijinal metin no: [6b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Revgancı Hüseyin b. Veliyüddin’in, Yodac v. Çilbon’a borcunu ödemesi gerektiği ve muarazadan men edildiği Mu‘ârazadan ba‘de’l-men‘ mu‘terif olduğu 938 guruş hüküm Ma‘rûz Yodac v. Çilbon Yahûdi meclis-i şer‘-i münîrde Yasef beled-i Avram ve Boyacı İsak Yahûdiler hâzır oldukları hâlde Revgancı Hüseyin b. Veliyüddin nâm kimesne mahzarında mezbûr Hüseyin bundan akdem yedimden iştirâ ve kabz eylediği ma‘lûmü’l-keyl susam semeninden bâkī alacağım olan bin beş yüz on üç buçuk guruşun dört yüz yirmi beş guruşunu emrimle hâzır-ı mersûm Yasef’e ve yüz kırk dokuz buçuk guruşuna mesfûr İsak Yahûdi’ye beş yüz yetmiş beş buçuk guruşunu edâ etmekle bâkīsi olan dokuz yüz otuz sekiz buçuk guruşu mezbûr Hüseyin’den hâlâ taleb ederim deyü da‘vâ ettikde ol dahi cevâbında müdde‘î-i mesfûra ol mikdâr guruş deyni olduğunu ikrâr u i‘tirâf edip lâkin deynim olan meblağ-ı mezkûrun dört yüz on iki buçuk guruşunu müdde‘î-i mesfûr Yodac Yahûdi’ye ve hâzırân-ı mersûmânın kabzlarını mu‘terif oldukları meblağ-ı mezkûrdan mâ‘adâ üç yüz on yedi buçuk guruşunu dahi mesfûr Yasef Yahûdi’ye ve mersûm İsak Yahûdi’nin kabzını mu‘terif olduğu yüz kırk dokuz buçuk guruşdan mâ‘adâ yüz elli buçuk guruş mesfûr İsak Yahûdi’ye edâ ve teslîm etmemle zimmetimde ancak elli sekiz buçuk guruş deynim kalmışdır deyü ol mikdârında eylediği def‘ini müdde‘î-i mesfûr Yodac ve hâzırân-ı mersûmândan her biri inkâr etmeleriyle müdde‘î-i mesfûr ber-vech-i muharrer def‘ ve teslîm müdde‘âlarına ityân-ı beyyineden ızhâr-ı acz ve istihlâf eylediğine binâen mesfûrun Yodac ve Yasef ve İsak Yahûdilerden her birine başka başka vech-i şer‘î üzere yemîn verilmeğin mûcebiyle dâfi‘-i mezbûr Hüseyin def‘ ve da‘vâ-yı mezkûreleriyle mesfûrûna bilâ-beyyine mu‘ârazadan ba‘de’l-men‘ ikrâr u i‘tirâf mûcebince lâzım gelen meblağ-ı mezkûr dokuz yüz otuz sekiz buçuk guruşu müdde‘î-i mesfûr Yodac Yahûdi’ye edâ ve teslime mezbûr Hüseyin’e tenbîh olunduğu İslâmbol Mahkemesi’nden huzûr-ı âlîlerine i‘lâm olundu. Fî-9 min-şehr-i Ramazani’l-mübârek sene [1]216