İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 97 Hüküm no: 45 Orijinal metin no: [6b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Begos v. Markar’ın alacak davasında Kuyumcu Matos ile sulh oldukları 90 [guruş]a sulh Ma‘rûz Kuyumcu esnâfından arzuhâl eden Begos v. Markar zimmî meclis-i şer‘-i münîrde arzuhâlde mastûr Kuyumcu Matos v. Satet nâm zimmî muvâcehesinde mersûm Matos zimmî zimmetinde târih-i i‘lâmdan dört sene mukaddem yedimden ve mâlımdan iştirâ ve kabz eylediği dört vakıyye mercan semeninden bin iki yüz guruş alacağım olmağla taleb ederim deyü sâbıkā şer‘iyyâtı müderrisîn-i kirâmdan es-Seyyid Mehmed Efendi huzûrunda da‘vâ eylediğimde ol dahi inkâr etmekle benim müdde‘âma şâhidlerim mevcûd olmamağla talebimle mersûm Matos zimmîye yemîn verilmeğin mûcebince ben bilâ-beyyine mu‘ârazadan men‘ olunup mersûm Matos zimmî yedine bir kıt‘a i‘lâm-ı şer‘î i‘tâ olunmuşdu el-hâletü hâzihi şâhidlerime zafer bulmamla meblağ-ı mezkûr bin iki yüz guruşu mersûm Matos zimmîden taleb ederim deyü tasaddî eylediğim da‘vâmdan bâ-vesâtet-ı muslihîn mesfûr ile kat‘-ı nizâ‘ doksan guruş bedel-i makbûza ba‘de akdi’l-musâlahati ve’l-kabûl ziyâde müdde‘âma ve bi’l-cümle husûs-ı mezkûra müte‘allika âmme-i de‘avî ve kâffe-i mütâlebâtdan mersûm Matos zimmînin zimmetini kabûlü hâvi ibrâ ve iskāt eyledim deyü ba‘de’l-ikrâr ve’t-tasdîk bu vechile kat‘-ı nizâ‘ eyledikleri İslâmbol Mahkemesi’nden huzûr-ı âlîlerine i‘lâm olundu. Fî-11 min-Ramazan sene [1]216