İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 97 Hüküm no: 46 Orijinal metin no: [6b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yahûdi tâifesinden Yasef v. İsak, Mosi v. Salmon, Sabetay v. Salmon ve diğer esnafın bükme imaline izin verildiği Mu‘ârazadan men‘ Ma‘rûz Bükmeci esnâfı kalfalarından arzuhâl eden Diyo v. Rafael ve Toma v. Agob ve Baron v. Ohannes ve Begos v. Kombavis ve Kirkor v. Anberson ve Agob v. Rafaelve Bedros v. Ohan nâm zimmîler meclis-i şer‘-i münîrde esnâf-ı mezkûre kethüdâsı Abdüllatif Ağa hâzır olduğu hâlde zikri âtî yedi aded bükmeci dolabına mâlik ve mutasarrıflar olan Yasef v. İsak ve Mosi v. Salmon ve Sabetay v. Salamon ve Danyel v. Hırisya ve Salamon v. Mosi ve diğer Yasef v. Vadil nâm Yahûdiler muvâcehelerinde mesfûrûn Yahûdiler mukaddemâ tulumba şeridi nesc eder makūleden iken mesfûrûn tulumba şeridi destgâhı yüz elli adede münhasıra olmağla kırk üç adedi ehl-i İslâm ve zimmî tâifesi taraflarında ve yüz yedi adedi Yahûdi tâifesi tasarruflarında ve on beş aded bükme dolabı zimmîler tasarruflarında ve amelemiz sınıf-ı vâhid ve bâ-berât-ı âlişân kethüdâmız dahi bir olmakdan nâşî bu esnâda ekser nâs kalıpdan bükme isti‘mâl ve tulumba şeridi isti‘mâl eder kalîl olduğuna binâen bizim san‘atımız mu‘attal olmağla yedlerinde olan yüz yedi aded şerid ve destgâhın yedi adedi fürû‘-nihâde ve tenzîl ve bükme dolabına tebdîl olunup bükmeci dolabı bâ-fermân-ı âlî yirmi iki aded iblağ ve sâlifü’z-zikr işbu yedi nefer Yahûdilerin isimlerine tahrîr ve her bir dolaba üçer Yahûdi bükme i‘mâl etmek üzere ta‘yîn olunan cem‘an yirmi sekiz nefer Yahûdi tâifesinin bükme i‘mâllerine izin ve ruhsatı hâvi tuğra-yı garrâ ile mu‘anven bir kıt‘a emr-i âlîşân i‘tâ buyrulmağın onlar dahi mallarıyla bükme dolabı tedârik ve bu ana kadar kendileri i‘mâl ve bazıları âhara îcâr ile i‘mâl ederler idi el-hâletü hâzihi Yahûdi tâifesi mersûmûnun yedlerinde şerid dolabı olmağla zikr olunan dolabları mücerred biz kalfa olduğumuza binâen yedlerinde mülkleri olan yedi aded dolabı bize teslîm eylesinler deyü tasaddî eyledikleri da‘vâları takrîr-i meşrûhları üzere meşrû‘a olmamağla kelâmlarına iltifât olunmayıp bî-vech mu‘ârazadan men‘ olundukları İslâmbol Mahkemesi’nden huzûr-ı âlîlerine i‘lâm olundu. Fî-9 min-şehr-i Ramazan sene [1]216