İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 98 Hüküm no: 47 Orijinal metin no: [7a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Mehmed Emin b. Süleyman’ın, Dimitri v. Aydazi aleyhine açtığı davada iddiasını ispat edemediğinden muarazadan men edildiği Mu‘ârazadan men‘ Ma‘rûz Mahrûse-i Bursa ahâlîsinden Emânetçi es-Seyyid Mehmed Emin b. el-Hâc Süleyman meclis-i şer‘-i münîrde tüccârdan Mustafa b. Ömer hâzır olduğu hâlde sefîne reislerinden Yalâkabadlı Dimitri v. Aydazi zimmî muvâcehesinde hâzır-ı merkūm Mustafa’nın malı olup yedimde emânet olan iki çuval derûnuna mevzû‘ yüz yirmi vakıyye meşdûd ipeği Yalâkabad iskelesinde mersûm Dimitri zimmînin sefînesine tahmîl ve ben ma‘an râkib olup Âsitâne-i aliyyeye gelir iken esnâ-yı rahta fırtına zuhûr ettikde hâlâs me’mûlüyle sefîneden ba‘zı eşyâ deryaya ilkā olunup lâkin zikr olunan ipeği mersûm Dimitri zimmî fuzûlî ahz edip hâlâ yedinde olmağla bana teslîme tenbîh olunmak murâdımdır deyü da‘vâ ettikde ol dahi cevâbında zikr olunan iki çuval ipeği fırtına zuhûrunda kayığımda olan yolcular deryaya ilkā eylediler ben kabz etmedim deyü inkâr etmekle müdde‘î-i mezbûr ber-vech-i muharrer müdde‘âsına ityân-ı beyyineden ızhâr-ı acz ve istihlâf etmekle mersûm Dimitri zimmîye ber-nehc-i şer‘î yemîn verilmeğin mûcebiyle müdde‘î-i merkūm da‘vâ-yı mezkûresiyle mersûm Dimitri zimmîye bilâ-beyyine mu‘ârazan men‘ olunduğu İslâmbol Mahkemesi’nden huzûr-ı âlîlerine i‘lâm olundu. Fî-11 min-şehr-i Ramazani’l-mübârek sene [1]216