İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 99 Hüküm no: 48 Orijinal metin no: [7a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Naile Hanım bt. Seyyid Hasan Bey’in miras davasında Hatice Hatun ile sulh olduğu 150 guruşa sulh-ı ibrâ ile kat‘-ı nizâ‘ Ma‘rûz Mübârek rikāb-ı kâm-yâb-ı hüsrevânîye takdîm-i arzuhâl eden İstanbul’da Kapalıfırın kurbünde Cezeri Kasımpaşa Mahallesinde sâkin iken bundan akdem vefât eden Hâcegân-ı Dîvân-ı Hümâyûndan Mehmed Selim Efendi b. Abdullah’ın verâseti zevce-i metrûkesi Şerîfe Nâile Hanım bt. es-Seyyid Hasan Bey ile li-ümmin-kızkarındaşı Hatice Hatun’a münhasıra olup lâkin müteveffâ-i mezbûrun sülüs vasiyeti olmağla tashîh-i meselesi altı sehmden olup sihâm-ı mezbûreden iki sehmi vesâyâsı için sülüsüne ve bir sehmi zevcesi merkūmeye ve üç sehmi kız karındaşı mezbûreye isâbeti tahakkukundan sonra zâtı ta‘rîf-i şer‘î ile mu‘arrefe olan sâhibe-i arzuhâl mezbûre Hatice Hatun meclis-i şer‘-i münîrde derûn-ı arzuhâlde mezkûretü’l-isim kezâlik zâtı mu‘arrefe zevce-i merkūme Şerîfe Nâile Hanım mahzarında merkūme Şerîfe Nâile Hanım karındaşım ve mûrisimiz müteveffâ-i merkūm Mehmed Selim Efendi’nin terekesinden hâric ez defter-i kassâm mecmû‘u bin guruş kıymetli yeşil çukaya kaplı bir semmur kürk ve bir simli en‘âm kîsesi ve iki çiçekli kaftan ve iki anteri ve iki Lahuri şal ve iki mükemmel oda döşemesi ve iki kilimi zevce-i merkūme ketm ve ihfâ ve karındaşım müteveffâ-i mezbûrun Sarraf Çobanoğlu Maniyel zimmî zimmetinde alacağı olan iki bin beş yüz guruşu müstakilleten ahz etmekle eşyâ ve nakd-i mezkûrdan hisse-i ma‘lûmemi merkūme Şerîfe Naile Hanım’dan hâlâ taleb ederim deyü da‘vâ eylediğimde ol dahi cevâbında yedimde olup bin iki yüz on dört senesi Cumâdelûlâsının onuncu günü târihiyle muvarraha ol târihde Mahmudpaşa mahkemesi nâibi olan müderrisîn-i kirâmdan Sârim Paşazâde Mehmed Râşid Efendi’nin imzâ ve hatmini hâvi bir kıt‘a mübâree hücceti nâtık olduğu üzere ber-mûceb-i defter-i kassâm senin hisse-i irsiyyene isâbet eden yüz elli bir buçuk guruş ve sarraf-ı mersûm Manil zimmetinde alacağı olan yüz seksen guruşdan hissene isâbet eden doksan guruşu sana def‘ ve teslîm sen dahi tamamen ba‘de’l-kabz karındaşın müteveffâ-i mezbûrun kalîl ve kesîr ma‘lûm ve mechûl terekesine ve târih-i hüccet-i mezkûreye gelince sâire müte‘allika âmme-i de‘âvi ve kâffe-i mütâlebâtdan benim zimmetimi ibrâ ve iskāt etmişdin deyü beni def‘a tasaddî ve ber-vech-i muharrer ziyâde müdde‘âlarımı inkâr-birle beynimizde ba‘de vukū‘ı’l-münâza‘a bâ-tavassut-ı muslihîn ben tasaddî eylediğim da‘vâ-yı mezkûrelerimden merkūme Şerîfe Naile Hanım ile kat‘an li’n-nizâ‘ yüz elli guruş bedel-i makbûza ba‘de akdi’l-müsalahati ve’l-kabûl ziyâde müdde‘âma bi’l-cümle müteveffâ-i mezbûrun dahil-i defter ve haric-i ez-defter terekesine ve husûs-ı mîrâsına ve sâir hukūk-ı şer‘iyyeye müte‘allika âmme-i de‘âvî ve kâffe-i mütâlebatdan merkūme Şerife Naile Hanım’ın zimmetini ibrâ-yı âmm-ı sahîh-i şer‘î ile ibrâ ve iskāt eylediğimde ol dahi ber-vech-i muharrer ibrâmı kabûl eyledi deyü ba‘de’l-ikrâr ve’t-tasdîk bu vechile kat‘-ı nizâ‘ eyledikleri bi’t-terâzi tescîl ve İslâmbol Mahkemesi’nden huzûr-ı âlîlerine i‘lâm olundu. Fî-15 min-şehri Ramazani’l-mübârek sene [1]216 Şuhûdü’l-hâl: Kahveci Mustafa, es-Seyyid el-Hâc İbrahim Ağa b. Hüseyin, Mehmed b. Osman, Muhzır Halil Çelebi, Muhzır Süleyman Çelebi