İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 102 Hüküm no: 53 Orijinal metin no: [7b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Murad Bey Kaptanî Halil b. Osman’ın terekesinin taksimi 4750,5 riyâl hüküm Ma‘rûz Mîrîmîrân-ı kirâmdan sâhib-i arzuhâl Seydî el-Hâc Ali Paşa b. Abdullah tarafından husûs-ı âtî’l-beyânda vekîl olduğu Hüseyin b. Abdullah ve Hâfız Mehmed b. Mehmed şehâdetleriyle sâbit olan Ömer Efendi b. el-Hâc Ahmed Çarşamba günü huzûr-ı âlîlerinde ma‘kūd meclis-i şer‘-i münîrde diyâr-ı Mısrıyye’de vâki‘ olan Rahmaniye muharebesinde şehîden vefât eden Murad Bey Kaptânî Halil b. Osman’ın verâseti Hanya kazâsında sâkine vâlidesi Fâtıma ile li-ebeveyn er karındaşı İbrahim ve kız karındaşı Emine’ye münhasıra olmağla verese-i mezbûrûndan arzuhâlde mezkûr merkūm İbrahim muvâcehesinde müvekkilim mûmâ-ileyh Ali Bey bin iki yüz on bir senesi Şa‘banının on beşinci günü Mısr-ı Kahire’de Cize nâm mahalde vâki‘ kendi menzilinde malından müteveffâ-i merkūm Halil Kaptan’a ol diyârda beheri dörder guruşa râyic üç bin üç yüz doksan sekiz buçuk Fransa riyâli ikrâz ve teslîm ol dahi iktirâz ve kabz ve yine malından kırk kantar kahveyi bin üç yüz elli iki Fransa riyâli semen tesmiyesiyle müteveffâ-i merkūma bey‘ ve teslîm ol dahi iştirâ ve kabz eylediğinden sonra ciheteyn-i mezkûreteynden alacağı olan cem‘an dört bin yedi yüz elli buçuk riyali kable’l-ahz ve’l-edâ merkūm Halil Kaptan fevt olmağla meblağayn-ı mezkûreyni merkūm İbrahim’in bi’l-verâse vâzı‘u’l-yed olduğu tereke-i vâfiyesinden bi’l-vekâle taleb ederim deyü ba‘de’d-da‘vâ ve’l-istintak ol dahi cevâbında karındaşı müteveffâ-i merkūmun mudârebe tarîkiyle Hânî Mustafa Ağa’da olan alacağından dokuz bin beş yüz kırk altı guruş ve Penkâz Ali’de alacağından beş bin guruş ki cem‘an on dört bin beş yüz kırk altı guruşu merkūm Halil Kaptan’ın vefâtından sonra kabzını ve ol mikdâr terekesine vaz‘-ı yedini ikrâr ve müdde‘î vekîl-i mezbûrun ber-vech-i muharrer müdde‘âlarını inkâr etmekle müdde‘î vekîl-i mezbûr ber-minvâl-i muharrer müdde‘âlarını lede’t-tezkiye adl ve makbûlü’ş-şehâde idükleri ihbâr olunan İslâmbol’da Tahtakale kurbünde sâkin Ahmed b. Mustafa ve Sultan Selim kurbünde Çukurbostan’da sâkin es-Seyyid Ali b. Ebîbekir nâm kimesneler şehâdetleriyle bi’l-muvâcehe ber-nehc-i şer‘î ba‘de’l-isbât müvekkil-i mûmâ-ileyh Ali Paşa dâ‘îhânemizde ma‘kūd meclis-i şer‘-i hatîrde merkūm İbrahim hâzır olduğu hâlde meblağ-ı mecmû‘-ı mezkûrda müteveffâ-i merkūm Halil Kaptan’ın hayatında küllen ve ba‘zen bir nesne ahz veyâhud hibe veyâhud âhar tarîk ile bir vechile ahz u istîfâ etmediğine mûmâ-ileyh Ali Paşa’ya yemîn verilmeğin mûcebiyle meblağ-ı mecmu‘-ı mezkûr dört bin yedi yüz elli buçuk riyâl tereke-i müteveffâ-i merkūmdan iktizâ eylediği İslâmbol Mahkemesi’nden huzûr-ı âlîlerine i‘lâm olundu. Fî-23 min-şehr-i Ramazan sene [1]216