İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 103 Hüküm no: 54 Orijinal metin no: [8a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Rıza Efendi b. Abdurrahim Efendi’nin, Tütüncü Kigorak v. Avadeş’te alacağının kalmadığı 950 [guru]ş ahz u kabz Ma‘rûz Mevâlî-i izâmdan muvakkaten Edirne Kādısı Faziletlü Ali Rızâ Efendi b. el-Müvellâ el-merhûm Abdurrahim Efendi tarafından husûs-ı âtî’l-beyânda vekîl olduğu Hasan b. Halil ve Mehmed b. Abdi nâm kimesneler şehâdetleriyle sâbit olan müderrisîn-i kirâmdan damadları Ahmed Reşid Efendi b. Mehmed Celaleddin Efendi meclis-i şer‘-i münîrde Tütüncü Kigork v. Avadis zimmî muvâcehesinde müvekkilim mûmâ-ileyh Ali Rızâ Efendi bundan akdem benim vesâtetimle mersûm Kigork zimmîden iktirâz ve kabz eylediği dört yüz elli guruş deyni mukābelesinde bir beyaz donluk şal ve bir çatari ve bir destâr ve bir top beldâr ve iki top Hind sevayisi ve bir top Haleb sevâyisini yedine rehn vaz‘ ve teslîm etmişdi el-hâletü hâzihi meblağ-ı mezkûr dört yüz elli guruşu benden ahz-birle eşyâ-i mezkûreyi rehniyetden ba‘de’l-fek bana teslîme mersûm Kigork zimmîye tenbîh olunmak bi’l-vekâle matlûbumdur deyü da‘vâ ettikde ol dahi cevâbında müdde‘î-i merkūmun ber-vech-i muharrer müdde‘âsını ikrâr u i‘tirâf etmekle mûcebince meblağ-ı mezkûr dört yüz elli guruşu ahz-birle rehân-ı mezkûreyi vekîl-i merkūm Ahmed Reşid Efendi’ye teslîme mersûm Kigork zimmîye ba‘de’t-tenbîh mersûm Kigork zimmî yine meclis-i şer‘de ikrâr ve takrîr-i kelâm edip ânifen bana teslîme tenbîh-i şer‘î olunan eşyâ-i mezkûre rehiniyle dört yüz elli guruş ve bilâ-rehin müvekkil-i mûmâ-ileyhde alacağım olan beş yüz guruş ki cem‘an dokuz yüz elli guruşu vekîl-i merkūm Ahmed Reşid Efendi bana ben dahi rehân-ı mezkûreyi kendiye işbu meclis-i şer‘de def‘ ve teslîm ve her birimiz ahz u kabz etmemizle fîmâ ba‘d zikr olunan husûslara müte‘allika da‘vâ ve nizâ‘ ve husûmetimiz kalmadı deyü ikrâr ve tasdîkleri tescîl ve İslâmbol Mahkemesi’nden huzûr-ı âlîlerine i‘lâm olundu. Fî-5 min-Ramazan sene [1]216