İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 106 Hüküm no: 60 Orijinal metin no: [8b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dimitri v. Okir’in, Mehmed Said Ağa ve Mustafa Ağa ile alacak davasında sulh oldukları 150 guruşa sulh Ma‘rûz Celeb tâifesinden olup arzuhâl eden Dimitri v. Okir zimmî meclis-i şer‘-i münîrde arzuhâlde isimleri mezkûr kasab ustalarından Mehmed Said Ağa b. el-Hâc Mehmed ve es-Seyyid Mustafa Ağa b. es-Seyyid Hüseyin mahzarlarında mezbûr Mehmed Said Ağa zimmetinde bin iki yüz on dört senesi hilâlinde yedimden ve malımdan iştirâ ve kabz eylediği yüz yetmiş yedi re’s ağnâm semeninden bâkī iki yüz on iki buçuk guruş ve merkūm es-Seyyid Mustafa Ağa’ya bey‘ ve telim eylediğim seksen re’s ağnâm semeninden üç yüz seksen sekiz buçuk guruş zimmetinde alacağım olmağın meblağayn-ı mezkûreyni merkūmân Mehmed Said Ağa ve es-Seyyid Mustafa Ağa’dan hâlen taleb ederim deyü da‘vâ eylediğimde onlar dahi cevâblarında ber-vech-i muharrer müdde‘âlarımı her biri ikrâr lâkin deynim olan meblağayn-ı mezkûreyni emrinle kasabbaşı müteveffâ el-Hâc Mehmed Ağa’ya hayatında vermişdin deyü beni def‘a tasaddî ve bu vechile beynimizde ba‘de vukū‘ı’l-münâza‘a bâ-tavassut-ı muslihîn ben ber-vech-i muharrer tasaddî eylediğim da‘vâ-yı mezkûrelerimden merkūmân ile yüz elli guruş bedel-i makbûza ba‘de akdi’l-musâlahati ve’l-kabûl ziyâde müdde‘âlarıma ve bi’l-cümle husûs-ı mezkûra müte‘allika âmme-i da‘vâdan ben merkūmân Mehmed Said Ağa ve Mustafa Ağa’nın zimmetlerini ibrâ-yı âmm-ı sahîh-i şer‘î ile ibrâ ve iskāt eylediğimde onlar dahi bedel-i sulh-i mezkûra müte‘allika âmme-i da‘vâdan benim zimmetimi ibrâ ve iskāt ve her birimiz ber-vech-i muharrer âharın ibrâsını kabûl eyledik deyü ba‘de’l-ikrâr ve’t-tasâduk bu vechile kat‘-ı nizâ‘ eyledikleri İslâmbol Mahkemesi’nden huzûr-ı âlîlerine i‘lâm olundu. Fî-8 min-Şevvâl sene [1]216