İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 107 Hüküm no: 61 Orijinal metin no: [8b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa b. İbrahim’in vârislerinin, Dimitri v. Okir’e karşı açtığı alacak davasında, iddialarını ispat edemediğinden muarazadan men edildiği Mu‘ârazadan men‘ Ma‘rûz Kasabbaşı müteveffâ es-Seyyid el-Hâc Mehmed Ağa b. İbrahim’in hasran vârisleri olan sulbî sagīr evlâdları es-Seyyid Mehmed Emin ve es-Seyyid Hüseyin ve es-Seyyid Ali’nin bâ-hüccet vasîleri olan ammizâdeleri es-Seyyid Osman b. es-Seyyid Hasan meclis-i şer‘-i münîrde celeb tâifesinden Dimitri v. Okir nâm zimmî muvâcehesinde müteveffâ-i mezbûr el-Hâc Mehmed Ağa kasabbaşılığı evânında bin iki yüz on dört senesi hilâlinde Kuşan cânibinden mîrî fiyatıyla cem‘ olunacak ağnâmın cem‘ ve tahsîlini mersûm Dimitri zimmîye ihâle edip ol dahi mahâll-i mezkûrda kendi malıyla sekiz yüz on bir re’s ağnâm iştirâ ve Âsitâne-i aliyyeye getirip kasab ustalarına ba‘de’l-bey re’s-i malı fürû-nihâde olundukdan sonra iki bin iki yüz sekiz guruş fâide hâsıl olmağla meblağ-ı mezkûrdan nısfı mersûm Dimitri zimmînin hissesine ba‘de’l-ifrâz bâkīsi olan bin yüz dört guruşu mesfûr Dimitri zimmîden bi’l-vesâye taleb ederim deyü tasaddî eylediği da‘vâsı takrîr-i meşrûhu üzere meşrû‘a olmamağla vasî-i mezbûrun da‘vâ-yı mezkûresine iltifât olunmayıp bî-vech mu‘ârazadan men‘ olunduğu İslâmbol Mahkemesi’nden huzûr-ı âlîlerine i‘lâm olundu. Fî-8 min-Şevvâl sene [1]216