İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 107 Hüküm no: 62 Orijinal metin no: [8b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abraham ve Despino Nasrâniye’nin dükkanına açtıkları pencerenin, Zübeyde bt. Mustafa’nın evine baktığından ve zarar verdiğinden kapatılması gerektiği Pencere sedd ü bendine ta‘ahhüd Ma‘rûz Sâdır olan fermân-ı âlîlerine imtisâlen zikri âtî husûsun mahallinde bi’l-mu‘âyene fasl ve hasmı için kıbel-i şer‘den mürsel kâtib-i sâni Merhabâzâde Mahmud Efendi İstanbul’da Çelebioğlu Mahallesi’nde vâki‘ münâza‘un-fîh olan nâ-tamam kârgîr dükkâna varıp cerîdede mazbûtü’l-esâmî Müslimîn huzûrlarında akd-i meclis-i şer‘-i kavîm eyledikde sâhibe-i arzuhâl Zübeyde bt. Mustafa nâm hatunun zevci ve tarafından husûs-ı âtî’l-beyânda vekîl olduğu zâtını ârifân Ali Ağa b. Halil ve Bostanî Ömer Ağa b. Hüseyin şehâdetleriyle sâbit olan Mehmed Beşe b. Mustafa meclis-i ma‘kūd-ı mezkûrda dükkân-ı mezkûrun mutasarrıfları derûn-ı arzuhâlde isimleri mezkûr Nazife bt. Ömer nâm hatunun zevci ve tarafından husûs-ı âtî’l-beyânda vekîl olduğu zâtını ârifân Mehmed Said Efendi b. Mahmud ve Mehmed Ali Efendi b. Süleyman şehâdetleriyle sâbit olan Ahmed Ağa b. Hüseyin nâm kimesne ile keresteci Abraham v. Suvana nâm zimmî ve şahsı mu‘arrefe olan Despino bt. Yorgi nâm Nasrâniye muvâcehelerinde mezbûrûn bu esnâda müceddeden binâ ve inşâ eyledikleri kârgîr dükkânının bir göz kemerinden müvekkilem mezbûrenin pencerelerine nezâret ve zarar-ı mübeyyeni olmağla sâlifü’z-zikr bir göz kemer sedd ü bend olunmak bi’l-vekâle matlûbumdur deyü bundan akdem da‘vâ sadedinde olduğumda vekîl-i mezbûr Ahmed Ağa ve Abraham zimmî ve Despino Nasrâniye dahi bi’t-terâzi zikr olunan kemeri duvar binâsıyla sedd u bend etmek üzere ta‘ahhüd eylediler dedikde asıl ve vekîl-i mezbûrûn dahi vekîl mukırr-ı merkūm Mehmed Beşe’yi cemî‘-i kelimâtında tasdîk ve bu vechile kat‘-ı nizâ‘ eylediklerini Mevlânâ-yı mezbûr mahallinde ba‘de’t-tahrîr ümenâ-i şer‘le meclis-i şer‘a inhâ eylediği İstanbul Mahkemesi’nden huzûr-ı âlîlerine i‘lâm olundu. Fî-7 min-L sene [1]216