İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 108 Hüküm no: 63 Orijinal metin no: [9a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bosna eyaletinin Hersek sancağındaki Zey kalesi müstahfızının mevacibinin ödenmesi gerektiği Mazbatadan derkenâr Ma‘rûz Âhar arzuhâl hâmişinde mastûr derkenâr nâtık olduğu üzere Bosna eyaletinde Hersek sancağında vâki‘Eşpozi Kalesi yerli müstahfızîn neferâtlarının bin iki yüz on bir senelerine mahsûben müstehak oldukları mevâciblerini cânib-i mîrîden ahz u kabz ve îsâle vekîlleri müteveffâ Salyaneci el-Hâc Mahmud’un sulbî kebîr oğlu ve mevâcib-i mezkûreyi havâle buyrulan mahallerden kabz edenlerden taleb ve da‘vâ ve ahz u kabza neferât-ı merkūmûn taraflarından vekîlleri olduğu ber-nehc-i şer‘î mukaddemâ sâbit olduğu hasmı tasdîkiyle zâhir olan sâhib-i arzuhâl Kale-i bâlâ dizdârı Osman nâm kimesne meclis-i şer‘-i münîrde derûn-ı arzuhâlde ismi mastûr sarraf tâifesinden Marat oğlu Rafael nâm zimmî mahzarında pederim müteveffâ-i mezbûr salyâneci el-Hâc Mahmud hayatında neferât-ı merkūmûnun mevâcib-i mezkûrelerine mahsûben cânib-i mîrîden havâleten i‘tâ buyrulan cem‘an dokuz bin altı yüz otuz altı guruşluk kırk kıt‘a ruznâmçe-i hümâyûn temessükâtını sarraf-ı mesfûra teslîm ve havâle buyrulan mahallerden an hazine hesabı üzere beher yüz guruşda yirmi beşer guruş tenzîliyle tahsîl ve ahz u kabza tevkîl ol dahi mebâliğ-i mezkûreden yirmi bir kıt‘a temessükâtla Karahisâr-ı Şarkī şâbhânesi mukāta‘ası malından havâle buyrulan dört bin iki yüz elli dört guruşdan beher yüzde yirmi beşer guruş tenzîl ile üç bin yüz doksan buçuk guruş mahallinden bi’l-vekâle ahz u kabz edip yedinde iken babam salyâneci merkūm el-Hâc Mahmud fevt oldukdan sonra sarraf-ı mesfûr mal-ı âhardan havâle buyrulup tahsîl edemediği beş bin üç yüz seksen iki guruşluk on dokuz kıt‘a temessükâtı bana teslîm etmekle makbûzu olan meblağ-ı mezkûru bi’l-asâle ve bi’l-vekâle taleb ederim deyü bundan akdem mîrî kâtibi eşrâf-ı kuzâtdan el-Hâc Abdullah Efendi’nin başbâkīkulu ağalara mahsûs odada akd eylediği meclis-i şer‘de da‘vâ eylediğimde ol dahi cevâbında ber-vech-i muharrer müdde‘âmı bi-tav‘ihi ikrâr u i‘tirâf edip lâkin baban salyâneci merkūm hayatında meblağ-ı mezkûr dört bin iki yüz elli dört guruşun beher yüz guruşda kırk guruşdan cem‘an bin yedi yüz guruşunu rızâsıyla tenzîl mâ‘adâ iki bin beş yüz elli dört guruşunu dahi mahallinden ba‘de’l-kabz Bosna’da vâki‘ Tuzla Kaptanı Süleyman Kaptan’ın mukāta‘a-i mezbûre cebelüsünden deyn-i mîrîsine mahsûben Darbhâne-i Âmire’ye teslîm eyle deyü bana emr etmekle ben dahi makbûzum olan meblağ-ı mezkûru emr-i mezkûruna binâen Darhâne-i Âmire’ye teslîm etmişdim deyü eylediği emir da‘vâsını ben inkâr etmemle dâfi‘-i mesfûr ber-minvâl-i meşrûh tasaddî eylediği def‘-i mezkûrunu isbât için kirâren ve mirâren ba‘de’l-istimhâl ve’l-imhâl müddet-i mehl-i şer‘î tamam ve ikāmet-i beyyineden aczi zâhir ve nümâyân olmağla da‘vâ-yı def‘-i mezkûruyla bana bilâ-beyyine mu‘ârazadan ba‘de’l-men‘ ikrâr u i‘tirâfıyla lâzım gelen sâlifü’z-zikr dört bin iki yüz elli dört guruşdan an hazine hesabı üzere beher yüz guruşda yirmi beşer guruşunu ba‘de’t-tenzîl bâkīsi olup şâbhâne-i mezkûre mukāta‘ası mutasarrıfı tarafından bi’l-vekâle makbûzu olan üç bin yüz doksan buçuk guruşu bana teslîm etmek üzere sarraf-ı mesfûre tenbîh eylediğini nâtık yedime işbu bir kıt‘a i‘lâm-ı şer‘î i‘tâ olunmuşdu el-hâletü hâzihi meblağ-ı mezkûru hâlâ edâ etmemekle bi’l-vekâle taleb ederim deyü da‘vâ ettikde ol dahi mazmûn-ı i‘lâm-ı mezkûru ikrâr lâkin şâbhâne-i mezkûre malından havâle buyrulan dört bin iki yüz elli dört guruşdan beher yüzde kırk guruş tenzîliyle iki bin beş yüz elli dört guruşu kabz ziyâde nesne kabz eylemediğimden mâ‘adâ makbûzum olan meblağ-ı mezkûrun dahi müteveffâ-i mezbûrun hayatında emriyle mezbûr Süleyman Kaptan’ın deyn-i mîrîsine teslîm etmişdim deyü ke’l-evvel def‘a mübâderet ve ziyâde kabzını inkâr etmemle tarefeyn beyâna ba‘de’l-havâle husûs-ı mezkûrda iştibâh olunduğuna binâen makbûzu olan meblağ-ı mezkûru hâlâ Sadrâzam ve vekîl-i mutlak Yusuf Paşa hazretlerinin kapıkethüdâsı es-Seyyid Mehmed Efendi’den suâl olundukda havâle olunan meblağ-ı mezkûr dört bin iki yüz elli dört guruşun beher yüzde yirmi beşer guruş tenzîliyle sarraf-ı mersûma teslîm olunan üç bin yüz doksan buçuk guruş olduğunu inhâ ve ol vechile hilâfı nümâyân ve def‘-i meşrûhuna ikāme eylediği kimesne edâ-yı şehâdet-i şer‘iyye edememekle şâhid-i âdil ikāmesine havâle olunup bir dahi zuhûr etmemekle henüz da‘vâlarına faysal verilmediği mazbût olmağın sâdır olan fermân-ı âlîlerine imtisâlen zabtı İslâmbol Mahkemesi’nden huzûr-ı âlîlerine i‘lâm olundu. Fî-9 min-Şevvâli’l-mükerrem sene [1]216