İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 111 Hüküm no: 67 Orijinal metin no: [9b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeliha bt. Abdullah’ın, Halil Efendi b. Şaban’a şetm ettiği için tazir ile cezalandırılması Ta‘zîrini hüküm Ma‘rûz Sâhibe-i arzuhâl Nefise Hatun’un zevci el-Hâc Halil Efendi b. Şaban meclis-i şer‘-i münîrde arzuhâlde mezkûre zâtı mu‘arrefe Zeliha bt. Abdullah muvâcehesinde mezbûre Zeliha Hatun târih-i i‘lâmdan üç gün mukaddem Sultan Bayezid câmi‘-i şerîfi havlusu kapısı ittisâlinde iskemle ile koluma ve göğsüme bi-gayr-ı hakkın darb ve pezevenk deyü bana şetm etmekle mûceb-i şer‘îsini taleb ederim deyü da‘vâ ettikde ol dahi cevâbında müdde‘î-i mezbûrun koluna ve göğsüne iskemle ile bi-gayr-ı hakkın darbını ikrâr ve şetm müdde‘âsını inkâr etmekle müdde‘iye-i mezbûre ber-vech-i muharrer şetm müdde‘âsını lede’t-tezkiye adl ve makbûlü’ş-şehâde idükleri ihbâr olunan Fesci Mahmud b. Ramazan ve Bıçakçı Mehmed Beşe b. Ahmed nâm kimesneler şehâdetleriyle bi’l-muvâcehe ber-nehc-i şer‘î isbât etmeğin mûcebince mezbûre Zeliha’ya şer‘an ta‘zîr iktizâ eylediği İslâmbol Mahkemesi’nden huzûr-ı âlîlerine i‘lâm olundu. Fî-12 min-Şevvâl sene [1]216