İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 112 Hüküm no: 68 Orijinal metin no: [9b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Abdullah b. Seyyid Hidayetullah’ın, İbrahim Edhem’deki alacağını kefil Mehmed Emin Ağa’dan tahsili Ma‘rûz Sâhib-i arzuhâl Mısırçarşısı attârlarından es-Seyyid Abdullah b. es-Seyyid Hidayetullah meclis-i şer‘-i münîrde çukadâr kāimmakām-ı sadr-ı âlî arzuhâlde mezkûrü’l-ism Mehmed Emin Ağa b. Osman mahzarında işbu hâzır bi’l-meclis kahveci Hâfız İbrahim Edhem b. Mehmed zimmetinde bâ-temessük cihet-i karzdan alacağım olan beş yüz guruşa merkūm Mehmed Emin Ağa işbu târih-i i‘lâm senesi Rebî‘ülâhirinin beşinci günü attârân kethüdâsı odasında kefîl ve zâmin olmağla meblağ-ı mezkûr beş yüz guruşu merkūm Mehmed Emin Ağa’dan kefâletine binâen hâlâ taleb ederim deyü ba‘de’d-da‘vâ ve’l-istintak ol dahi cevâbında müdde‘î-i mezbûrun nefsine kefîl olup meblağ-ı mezkûra kefâletini inkâr etmekle müdde‘î-i mezbûr ber-vech-i muharrer müdde‘âsını lede’t-tezkiye adl ve makbûlü’ş-şehâde idükleri ihbâr olunan Mehmed Ağa b. Ali ve el-Hâc Ali b. Abdullah nâm kimesneler şehâdetleriyle ber-nehc-i şer‘î isbât etmeğin mûcebince meblağ-ı mezkûr beş yüz guruşa bi-hükmi’l-kefâle müdde‘î-i mezbûra edâ ve teslîme merkūm Mehmed Emin Ağa’ya tenbîh olunduğu İstanbul Mahkemesi’nden huzûr-ı âlîlerine i‘lâm olundu. Fî-15 min-Şevvâli’l-mükerrem sene 1216