İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 112 Hüküm no: 69 Orijinal metin no: [9b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bostani Osman b. İbrahim’in, Mustafa b. Mehmed’i yaraladığı davada sulh oldukları Cerhden ibrâ Ma‘rûz Anadolu’da Boyabad kazâsına tâbi‘ Tefe karyesi ahâlîsinden sâhib-i arzuhâl bölükbaşıoğlu Bostani Mustafa b. Mehmed bi’t-terâzi meclis-i şer‘-i münîrde karye-i mezbûre ahâlîsinden arzuhâlde mezkûr eniştesi Bostani Osman b. İbrahim mahzarında mezbûr Bostani Osman târih-i i‘lâmdan üç buçuk ay mukaddem karye-i mezbûrede kendi samanhânem derûnunda yatağan bıçağı ile ağzıma ve boynuma ve sağ omuzum başına bi-gayr-ı hakkın darb ve cerh etmekle ba‘de’l-ber’ cerh-i mezkûrdan nâşî ta‘âm-ı müdgama halel gelmekle mûceb-i şer‘îsini mezbûr Bostani Osman’dan hâlâ taleb ederim deyü tasaddî eylediğim da‘vâmdan bâ-tavassut-ı muslihîn mezbûr Osman ile an inkâr üç yüz guruş üzerine sulh olduğumda ol dahi sulh-ı mezkûru ba‘de’l-kabûl bedel-i sulhden mâ‘adâ bi’l-cümle cerh-i mezkûra müte‘allika da‘vâdan mezbûr Bostani Osman’ın zimmetini kabûlü hâvi ibrâ ve iskāt eyledim deyü ba‘de’l-ikrâr ve’t-tasdîk bedel-i sulh-ı mezkûr üç yüz guruşu müdde‘î-i mezbûr Mustafa’ya edâ ve teslîme mezbûr Bostani Osman’a tenbîh olunduğu İslâmbol Mahkemesi’nden huzûr-ı âlîlerine i‘lâm olundu. Fî-14 min-Şevvâli’l-mükerrem sene [1]216